سرینگر// انسداد بدعنوانی بیورو (اے سی بی)نے منی گام اے میں مظفر احمد راتھر نامی ایک سرپنچ کو 9000 روپے کی رشوت لیتے ہوئے گرفتار کیا ہے۔ایک شکایت کنندہ نے بیورو سے رابطہ کیا۔ مظفر احمد راتھر، سرپنچ منیگام-اے نے شکایت کنندہ اور اس کی بہن کے درمیان جائیداد کے تنازعہ کو حل کرنے کے لیے رشوت طلب کی تھی۔
دونوں بہن بھائیوں میں جائیداد کی تقسیم کو لے کر کچھ تنازعہ چل رہا تھا۔ شکایت کنندہ کی بہن نے تصفیہ کے لیے ملزم سرپنچ سے رابطہ کیا۔ شکایت کنندہ نے الزام لگایا کہ سرپنچ اس معاملے کو حل کرنے کے لیے بار بار اس سے رشوت مانگ رہا تھا۔ ابتدائی طور پر سرپنچ کی طرف سے 20,000 کی رقم کا مطالبہ کیا گیا ، تاہم، بات چیت کے بعد، اس نے شکایت کنندہ سے 9 ہزار کی رقم قبول کرنے پر رضامندی ظاہر کی۔ شکایت کنندہ رشوت دینا نہیں چاہتا تھا اور اس کے بجائے قانون کے تحت فراہم کردہ ملزم سرکاری ملازم کے خلاف قانونی کارروائی کرنے کے لیے اینٹی کرپشن بیورو سری نگر سے رجوع ہوا۔شکایت موصول ہونے پر، بیورومیں ایک مقدمہ 13/2023درج کیا گیا اور تحقیقات شروع کی گئی۔تفتیش کے دوران، بیورو کی طرف سے ایک ٹریپ ٹیم تشکیل دی گئی، جس نے ایک کامیاب جال بچھا کر ملزم کو شکایت کنندہ سے 9000 روپے رشوت طلب کرتے ہوئے رنگے ہاتھوں پکڑ لیا۔ ملزمان سے موقع پر ہی رقم برآمد کر لی گئی۔ ملزم کی شناخت مظفر احمد راتھر ولدولی محمد راتھر ساکن منیگام، سرپنچ منیگام-A کے طور پر کی گئی ہے۔
