اشرف چراغ
کپوارہ// کرناہ علاقے میں سیکورٹی فورسز نے ملی ٹینٹ ماڈیول کا پردہ فاش کرکے پانچ اعانت کاروں سے اسلحہ وگولہ بارود ضبط کرنیکا دعویٰ کر کے انہیں حراست میںلیا ہے۔سینئر سپر انٹنڈنٹ آف پولیس کپوارہ یوگل مہناس نے ایک پریس کانفرنس کے دوران کہا کہ مصدقہ اطلاع ملنے کے بعد کپوارہ پولیس اور 9 پیرا فیلڈ رجمنٹ نے ایک مشترکہ آپریشن کے دوران سرحد پار کیلئے کام کرنے والے ملی ٹینٹ ماڈیول کا پردہ فاش کیا۔انہوں نے بتایا کہ پاکستانی زیر قبضہ کشمیر میں مقیم دو لشکر ہینڈلرز منظور احمد شیخ عرف شکور ولد ولی محمد شیخ ساکن گبرا کرناہ اور قاضی محمد خوشحال ولد قاضی سعید یاسین ساکن دھنی کرناہ کے ذریعے بھیجے گئے ہتھیار اور گولہ بارود کی اسمگلنگ میں ملوث دہشت گردی کے ایک ماڈیول کے بارے میں جانکاری موصول ہوئی۔انہوں نے کہاکہ پولیس نے ہتھیاروں کی اسمگلنگ میں ملوث ظہور احمد بٹ ولد نور حسین بٹ ساکن ریر سدھی پورہ کرناہ کی گرفتاری عمل میں لاکر اس کے قبضے سے ایک اے کے رائفل ، ایک میگزین،بیس گولیوں کے راونڈ، دوپستول اور دو پستول میگزین برآمد کرلئے۔ ترجمان نے بتایا کہ ابتدائی تحقیقات کے دوران منکشف ہوا کہ مذکورہ پاکستانی ہینڈرلز ظہور ،جو کہ لائن آف کنٹرول کے قریب ہی واقع ایک گائوں کا رہائشی ہے، کے ساتھ بھی رابطے میں تھے۔انہوں نے کہاکہ تفتیش اور لیڈز کی بنیاد پر مزید چار ملی ٹینٹ معاونین خورشید احمد راتھر ولد محمد یوسف راتھر ساکن گبراکرناہ ، مدثر شفیق ولد شفیق احمد ساکن گبرا کرناہ ، غلام سرور راتھر ولد محمد یوسف راتھر ساکن گبرا کرناہ اور قاضی فاضل الٰہی ولد قاضی محمد انور کی گرفتاری عمل میں لائی گئی اور ان کے قبضے سے پانچ شارٹ رائفلیں، پانچ اے کے میگزین،اور سولہ اے کے راونڈ برآمد کئے گئے۔پولیس کے مطابق معاملے کی بڑے پیمانے پر تحقیقات جاری ہے اورکراس بارڈر اسلحہ اسمگلنگ کے حوالے سے مزید انکشافات متوقع ہے۔
