عظمیٰ نیوزسروس
جموں//بزرگ رہنما ست پال شرما جمعہ کو بی جے پی کی جموں و کشمیر یونٹ کے بلامقابلہ صدر منتخب ہو گئے۔ پارٹی کے جموں و کشمیر سربراہ کے طور پر یہ ان کی دوسری میعاد ہوگی۔ شرما نے کارکنوں سے مطالبہ کیا کہ وہ یونین ٹیریٹری میں پارٹی کو مضبوط کرنے میں ان کا ساتھ دیں۔ ریٹرننگ آفیسر سنجے بھاٹیہ نے یہاں پارٹی ہیڈکوارٹر میں منعقدہ ایک تقریب میں اعلان کیا”ست پال شرما انتخابات میں بلا مقابلہ منتخب ہوئے ہیں۔ میں انہیں ان کی جیت پر مبارکباد پیش کرتا ہوں‘‘۔شرما، جنہیں گزشتہ سال نومبر میں پارٹی کی جموں و کشمیر یونٹ کے صدر کے طور پر نامزد کیا گیا تھا، نے قومی سطح پر پارٹی کے جاری “سنگٹھن پرو” کے تحت تنظیمی انتخابات کے ایک حصے کے طور پر جمعرات کو صدر کے عہدے کے لیے اپنا کاغذات نامزدگی داخل کیا۔ وہ قومی ریٹرننگ افسر سنجے بھاٹیہ کے سامنے کاغذات داخل کرنے والے واحد امیدوار تھے، جو ہریانہ سے تعلق رکھنے والے سابق ممبر پارلیمنٹ تھے، جنہیں پارٹی ہائی کمان نے جموں و کشمیر میں انتخابات کرانے کے لیے مقرر کیا تھا۔مرکزی وزیر ڈاکٹر جتیندر سنگھ، جموں و کشمیر اسمبلی میں قائد حزب اختلاف سنیل شرما، قومی مبصر شری کانت شرما، پارٹی کے جنرل سکریٹری تنظیم اشوک کول اور دیگر سینئر لیڈروں کے ساتھ، بی جے پی کے قومی نائب صدر سودان سنگھ نے ا نکی دستاربندی کی اور ہار پہنایا۔ شرما نے یہاں پارٹی سربراہ کا عہدہ سنبھالنے کے بعد کہا، ’’میں مرکز سے لے کر نچلی سطح کے کارکنوں تک پوری قیادت کا شکریہ ادا کرتا ہوں کہ انہوں نے مجھے ایک اور موقع فراہم کیا اور جموں و کشمیر میں پارٹی کی قیادت کرنے کے لیے مجھ پر اعتماد کیا‘‘۔انہوں نے تنظیم کو مزید مضبوط بنانے کے لیے پارٹی کارکنوں سے تعاون طلب کیا۔انہوں نے کہا’’ہم مل کر جموں و کشمیر میں اس پارٹی کو مضبوط بنا سکتے ہیں۔ ہم نے حالیہ اسمبلی انتخابات میں سب سے زیادہ ووٹ شیئر حاصل کیا۔ میں اس تنظیم کو نئی بلندیوں تک پہنچانے اور جموں و کشمیر کے لوگوں کی خدمت کو یقینی بنانے کے لیے آپ کا تعاون چاہتا ہوں‘‘۔63سالہ شرما کو حالیہ اسمبلی انتخابات میں پارٹی ٹکٹ دینے سے انکار کر دیا گیا تھا۔ ٹکٹوں کی تقسیم پر ناراضگی کے درمیان انہیں ستمبر میں پارٹی کے ورکنگ صدر کے طور پر مقرر کیا گیا تھا اور بعد میں پارٹی کے سب سے طویل عرصے تک رہنے والے جموںوکشمیریونٹ کے صدر رویندر رینا کی جگہ لے کر انہیں صدر کے عہدے پر فائز کیا گیا تھا۔رینہ، جنہوں نے مئی 2018میں شرما کی جگہ لی تھی اور ساڑھے چھ سال تک اس عہدے پر فائز رہے، پارٹی کی قومی ایگزیکٹو کا رکن بنایا گیا ہے۔جموں کے ایک ڈوگرہ خاندان میں پیدا ہوئے، شرما پیشے کے لحاظ سے ایک چارٹرڈ اکاؤنٹنٹ ہیں، جو 2014میں پہلی بار بی جے پی کے ٹکٹ پر جموں مغربی اسمبلی حلقہ سے جیتے تھے۔ انہوں نےپی ڈی پی۔بی جے پی حکومت میں 40دنوں تک کابینہ کے وزیر کے طور پر بھی خدمات انجام دیں۔شرما 2015 اور 2018 کے درمیان ڈھائی سال تک اس عہدے پر فائز رہے۔مرکزی وزیر ڈاکٹر جتیندر سنگھ نے کہا ’’میں شرما جی کو صدر کے عہدے پر منتخب ہونے پر مبارکباد دیتا ہوں۔۔شرما کی قیادت میں، بی جے پی کارکنان ملک کی ترقی میں اپنا حصہ ڈالنے کی اپنی پوری صلاحیت کو بروئے کار لائیں گے، اور لوگ جموں و کشمیر کے پارٹی کارکنوں کو ملک کی ترقی میں ان کے تعاون کا سہرا دیں گے‘‘۔
