یو این آئی
سری نگر//جس کے پاس زرعی زمین ہے، خواہ چار کنال ہی کیوں نہ ہو، اس کو روزگار کے لئے سرگرداں ہونے کی ضرورت نہیں ہے بلکہ وہ دوسروں کو روز گار فراہم کرسکتا ہے۔یہ باتیں سری نگر کے مضافاتی علاقہ ملورہ شالہ ٹینگ سے تعلق رکھنے والے کاشتکار بشیر احمد کی ہیں جو گذشتہ بیس برسوں سے اپنی زرعی اراضی پر مختلف قسموں کی سبزیاں اگا کر نہ صرف اچھی کمائی کر رہا ہے بلکہ کئی لوگوں کو بھی روز گار فراہم کر رہا ہے۔انہوں نے کہا کہ ہمارے علاقے کے تمام کنبے سبزی اگانے کے کام کے ساتھ وابستہ ہیں۔انہوں نے کہا کہ امسال خراب موسمی صورتحال کی وجہ سے پیداوار میں کمی واقع ہوئی۔ان کا کہنا: ‘لیکن امسال مارکیٹ بہت اچھا تھا اور سبزیوں کی ریٹ کافی اچھی رہی’۔بشیر احمد نے کہا کہ جولائی سے اکتوبر تک ہمارے علاقے سے مختلف قسم کی سبزیوں سے لدے5 سے 6 ٹرک روزانہ منڈیوں کی طرف روانہ ہوتی ہیں۔انہوں نے کہا کہ امسال ٹماٹر کی فی کلو ریٹ اوسطاً 80 روپے رہی جو کبھی ہم صرف 2 روپے میں ہی بیچتے تھے۔ان کا کہنا تھا: ‘میں نے جدید ٹیکنالوجی کی مدد سے صرف 8 مرلہ اراضی پر مولی، کھیرے وغیرہ لگائے جس کی مجھے کافی اچھی آمدنی ہوئی، میں نے ڈیڑھ لاکھ روپے میں کھیرے ہی بیچے’۔انہوں نے کہا کہ آج جدید مشینوں کی مدد سے ہر کام کا جا تا ہے لہذا ہمارے نوجوانوں کو بھی اس کے ساتھ وابستہ ہونے میں کوئی عار محسوس نہیں کرنی چاہئے۔
