محمد تسکین
بانہال// ریاسی ضلع کے شیو کھوری بھون کے قریب پیر کو پتھر گرنے سے دو یاتریوں کی موت ہو گئی اور ایک شدید زخمی ہو گیا۔پولیس نے بتایا کہ 45 سالہ سرون سہانی اور اس کا بھائی صاحب سہانی، اتر پردیش کے گورکھپور کے رہنے والے رام سنگھار سہانی کے بیٹے اور راجوری کے کھاؤس کے رنجیت سنگھ کے بیٹے نرمل سنگھ قریب کی سیڑھیوں پر درشن کے لیے اپنی باری کا انتظار کر رہے تھے، جب ان پر پتھر گرا۔اس حادثے میں سروین سہانی اور نرمل سنگھ کی موت ہو گئی۔
پولیس نے بتایا کہ اس واقعے کے بعد یاترا کو کچھ دیر کے لیے روک دیا گیا تھا، لیکن یہ دوبارہ شروع ہوگئی۔ادھرلیفٹیننٹ گورنر منوج سنہا نے ریاسی ضلع کے شیو کھوری میں پتھر گرنے کے واقعہ میں جان گنوانے والوں کے لواحقین کیلئے 5/5 لاکھ روپے اور زخمیوں کو 50/50 ہزار روپے کی ایکس گریشیا ریلیف کا اعلان کیا ،یو ٹی حکومت ان کے علاج کا خرچ برداشت کرے گی ۔ انہوں نے ناخوشگوار واقعہ کے دوران جانوں کے زیاّں پر دُکھ کا اظہار کیا اور ضلعی انتظامیہ کو ہدایت دی کہ وہ سوگوار خاندانوں کو ہر طرح کی ضروری مدد فراہم کرے اور زخمیوں کے بہترین علاج کو یقینی بنائے ۔
