ریاست میں پر امن صورتحال نہیں

سرینگر //نیشنل کانفرنس کے کار گذار صدر اور سابق وزیر اعلیٰ عمر عبداللہ نے وزیر اعلیٰ محبوبہ مفتی کے اُس بیان، جس میں انہوں نے کہا تھا کہ وادی میں حالات پرامن ہیں، کو مسترد کرتے ہوئے کہا کہ کشمیر میں صورتحال اب بھی پرامن نہیں ہے ۔اس دوران انہوں نے وزیر اعلیٰ کو پہلی بار ٹویٹ کرنے پر اُن کا خیر مقدم کیا ۔سماجی رابط ویب سائٹ ٹویٹر پر ٹویٹ کرتے ہوئے عمر نے کہا کہ وزیر اعلیٰ کا بیان ایسے میں وقت میں آیا جب اُن کا کابینہ کا وزیر ایک عسکری حملے میں بال بال بچ گیا جبکہ اس حملے میں تین عام شہریوں کی موت ہوئی  ۔انہوں نے کہا کہ وزیر اعلیٰ کا یہ دعویٰ تضاد  کے مترادف ہے ۔سابق وزیر اعلیٰ نے کہا کہ یہ امر باعث تشویش ہے کہ وزیر اعلیٰ کا یہ دعویٰ محض چند روز بعداُس وقت سامنے آیا  جب اُن کا ہی ایک وزیر ایک حملے میں بال بال بچ گیا ۔عمر نے وزیر اعلیٰ کو پہلی بار اپنا پہلا ٹویٹ کرنے پر مبارک باد پیش کی ۔عمر عبداللہ نے کہا ’ٹویٹر پر فروغ ِسیاحت سے متعلق ویڈیوکے ذریعے خاموشی توڑ نے پر بلا ٓخر 25ہزار فالورز محبوبہ مفتی کے ہوگئے ،اتوار کو محبوبہ مفتی نے ریاست میں فروغ ِ سیاحت کے حوالے سے اپنا پہلا ٹویٹ کیا جس میںا نہوں نے ایک اشتہاری دستاویز ی ویڈیو شیئر کی تھی ۔5منٹ کی اشتہاری دستاویزی فلم جنت بے نظیر کی خوبصورتی ،ثقافت اور مہمان نوازی پر مبنی ہے جسے محض48گھنٹے کی ریلیز کے بعد ابھی تک 10لاکھ60ہزار لوگوں نے دیکھا ہے۔عمر نے ریاستی وزیر اعلیٰ کو ٹویٹ کی دنیا میں اپنا پہلا قدم، رکھنے پر مبارک باد پیش کی ۔