عشرت حسین بٹ
منڈی//پیغمبر اسلام حضرت محمد مصطفیٰ ﷺکی شان میں گستاخی اور توہین آمیز الفاظ کا استعمال کرنے پر ضلع پونچھ کے تحصیل صدر مقام منڈی میں پیر کوصبح سے ہی منڈی تحصیل کی مذہبی سیاسی اور سماجی قیادت کی طرف سے پْر امن بند رکھا گیا تھا اور اس دوران بس اڈھ منڈی پر ہزاروں کی تعداد میں جمع ہو کر فرزندان توحید نے ایک جلسہ بھی منعقد کیا جس میں علما کرام اور سیاسی سماجی مقررین نے نبی اکرم حضرت محمد مصطفیٰﷺ کی شان میں کی گئی گستاخی کے حوالے سے شدید الفاظ میں مذمت کی گئی ۔اس موقع پر معززین نے مرکزی سرکار سے کہا کہ وہ ایسے پلید شخص کو سزا موت دے۔ بعد ازاں جلوس کی شکل میں عوام نے تحصیلدار منڈی اور ایس ایچ او منڈی کو ایک تحصیل کمپلیکس میں ایک میمورنڈم بھی پیش کیا جس میں یتی نرسنگ آنند نامی گستاخ رسول ؐپر سخت کاروائی اور ایک ایسے قانون کی سفارش کی گئی جس کے تحت کسی بھی مذہب یا مذہبی رہنما کی شان میں گستاخی کرنے والے کے خلاف سزا موت کے احکامات صادر کئے جائیں ۔اس دوران منڈی تحصیل میں تمام تر کاروباری مراکز ٹریفک نقل و حرکت بھی بند رہی وہیں میڈیا نمائندوں سے بات کرتے ہوئے جامعہ مسجد اعلیٰ پیر کے امام و خطیب مولانا سیدشاہد بخاری نے کہا کہ اس سے قبل اللہ کے نبی حضرت محمد مصطفیٰﷺ کی شان میں گستاخانہ الفاظ کہے گئے اور کچھ روز قبل یتی نرسنگ آنند نامی پلید نے حضور کی شان میں گستاخی کی جس کو لیکر منڈی تحصیل میں بھرپر بند اور پرْ ان احتجاج کیا گیا ۔انہوں نے کہا کہ اس حوالے سے انہوں نے تحصیلدار منڈی اور ایس ایچ او منڈی کرکو ایک میمورنڈم پیش کیا اور اس شخص کے خلاف منڈی پولیس تھانہ میں کیس درج کرنے کی بھی سختی سے سفارش کی گئی۔
پیغمبر اسلامؐ کی شان میں گستاخی کیخلاف مینڈھر میں احتجاج
جاوید اقبال
مینڈھر//سب ڈویژن ہیڈ کوارٹر مینڈھر پر نوجوان طبقہ کی طرف سے پیغمبر اسلامﷺ کی شان میں کی گئی گستاخی اور توہین کے خلاف ایک جلوس نکالا گیا جس میں بڑی تعداد میں نوجوانوں نے حصہ لیا۔ اس موقعہ پر نوجوانوں نے شدید نعرے بازی کرتے ہوئے کہاکہ حضور پاک ﷺ کی شان میں کی جانے والی کسی بھی گستاخی کو برداشت نہیں کیاجائے گا ۔مظاہرین نے کہاکہ یو پی کے ایک گستاخ کی طرف سے پیغمبر اسلام صلی اللہ علیہ والہ وسلم کی شان پاک میں گستاخانہ زبان استعمال کی گئی ہے جس کی وہ شدید مذمت کرتے ہیں ۔انہوں نے حکومت ہند سے اپیل کی کہ ایسے گستاخ کو پھانسی کی سزا دی جائے ۔مظاہرین نے متفقہ طور پر کہاکہ وہ کسی بھی صورت میں پیغمبر اسلام کی شان میں گستاخی برداشت نہیں کرسکتے۔ انکا کہنا تھا کہ اگر کارروائی نہیں کی گئی تو احتجاج کا راستہ اختیار کیا جائے گا جس کی زمہ داری مرکزی سرکار پر ہو گی۔ نوجوانوں کے جذبات کی قدر کرتے ہوئے علماء کرام بھی جلوس میں شامل ہوئے اور انہوں نے نوجوانوں کو پرامن طریقے سے احتجاج کرنے پر مبارک باد پیش کی۔انکا کہنا تھا کہ ہم نوجوانوں کے جذبات کی قدر کرتے ہیں جنہوں نے پیغمبر اسلام صلی اللہ علیہ والہ وسلم کے گستاخ کے خلاف اپنی آواز بلند کی۔ اِس موقعہ پر علماء کرام نے خطاب کرتے ہوئے حکومت ہند سے اپیل کی کہ پیغمبر اسلام کے گستاخ کے خلاف سخت سے سخت کارروائی عمل میں لائی جائے ۔
