پونچھ +راجوری//راجوری اور پونچھ میں سرکاری حکام نے ضلعی ترقیاتی کونسل کے ووٹوں کی گنتی کے لئے پانچ مختلف گنتی مراکز قائم کیے ہیں جن میں راجوری میں دو اور پونچھ میں تین مراکزشامل ہیں۔آج صبح 9 بجے شروع ہونے والے ووٹوں کی گنتی کے لئے ضلعی الیکشن آفیسرنے مکمل تیاری کرلی ہے۔ سخت سکیورٹی کے درمیان پونچھ میں3 مقامات پر ووٹوں کی گنتی کی جائے گی۔پونچھ کے انتخابی افسر راہول یادو نے بتایا کہ ووٹوں کی گنتی آج صبح 9 بجے شروع ہوگی،گنتی کے تمام مراکز پر پولیس اور نیم فوجی اہلکار بیلٹ بوکسز کی حفاظت کررہے ہیں، بیلٹ بوکسز سمیت گنتی کے سازوسامان پہلے ہی گنتی کے مراکز پر پہنچ چکے ہیں۔ انہوں نے بتایا کہ ضلع میں کل2لاکھ78ہزار ووٹرس میں سے2لاکھ 10ہزار وٹرس نے اؤنے ووٹ ڈالے،انہوں نے بتایا کہ114امیدوار وں نے انتخابات میں حصہ لیا ہے جن کی قسمت کا آج فیصلہ ہوگا۔انہوں نے بتایا کہ ووٹوں کی گنتی کے لئے پونچھ میںتین مراکز پر14ہال بنائے گئے ہیں جہاں گنتی ہوگی۔راہول یادو نے بتایا کہ ضلع پونچھ میں تین گنتی مراکز قائم کیے گئے ہیں جن میں ڈگری کالج پونچھ ، ڈی آئی ای ٹی کمپلیکس پونچھ اور شیش محل ہائر سیکنڈری اسکول پونچھ شامل ہیں۔پونچھ اور منڈی علاقوں کے ڈی ڈی سی حلقوں کے لئے ڈگری کالج پونچھ میں ووٹوں کی گنتی ہوگی جبکہ سرنکوٹ سب ڈویژن کے انتخابی حلقوں کے ووٹوں کی گنتی ڈی آئی ای ٹی کمپلیکس میں ہوگی جبکہ مینڈھر سب ڈویژن کے انتخابی حلقوں کے ووٹوں کی گنتی شیش محل ہائر سیکنڈری اسکول میں ہوگی ۔انہوں نے بتایا کہ 21دسمبرشام 6بجے سے ضلع پونچھ میں دفعہ 144نافذ کیا گیا ہے جو 22اور 23دسمبر کو بھی جاری رہے گا۔انہوں نے بتایا کہ کسی بھی طرح کے جلسے اور جلوس پر مکمل پابندی عائید ہوگی یہاں تک کہ جیتنے والے امیدوار بھی کسی طرح کی ریلی نہیں نکال سکتے ،شراب کی دکانوں اور باروں پر بھی پابندی عائد ہوگی۔چار سے زیادہ افراد ایک جگہ پر کھڑے نہیں رہ سکتے۔انہوں نے بتایا کہ گنتی کے مراکز کے 100میٹر تک کے احاطے میں کسی بھی شخص کو جانے کی اجازت نہیں ہے۔انہوں نے تمام عوام سے انتظامیہ کے تعاون کی اپیل کی۔سینئر سپرانٹنڈنٹ پولیس پونچھ رمیش انگرل نے بتایا کہ پرامن صورتحال کو یقینی بنانے کے لئے ضلع بھر میں سکیورٹی کے سخت انتظامات کئے گئے ہیں۔ اس دوران پونچھ میں جموں وکشمیر پولیس نے متعدد گاڑیاں ضبط کیں اور ڈی ڈی سی پول کے ووٹوں کی گنتی کے دوران امن میں خلل ڈالنے کی کوشش کرنے پر متعدد شخص کو گرفتار کرلیا ہے جن کے قصبے سے سمگل شدہ لکڑی کی لاٹھیاں پکڑی گئی ہیں۔ایس ایس پی پونچھ رمیش انگل نے کہا "فول پروف پروف سیکیورٹی کو یقینی بنانے کے لئے پونچھ قصبے میں سخت انتظامات کیے گئے ہیں اور گاڑیوں کے داخلے کو باقاعدہ بنایا جارہا ہے" ۔انہوں نے بتایا کہ ناکہ چیکنگ کے دوران پونچھ قصبے میں داخل ہونے والی درجنوں نجی کاروں کو لکڑی کے ڈنڈوں سمیت ضبط کیاگیا۔ایس ایس پی نے کہا "ہم نے ڈھائی سو سے زیادہ ڈنڈے ضبط کرکے کچھ گاڑیاں ضبط کرنے کے علاوہ کچھ افراد کو گرفتار کیا ہے"۔اسی طرح ضلع راجوری میں حکام نے دو گنتی مراکز قائم کیے ہیں جن میں ایک ڈگری کالج راجوری ہے جہاں چھ حلقوں کی گنتی ہوگی جبکہ گوجربکروال ہاسٹل راجوری کے گنتی مرکز میں آٹھ حلقوں کے لئے ووٹوں کی گنتی ہوگی۔ ڈپٹی کمشنر راجوری محمد نذیر شیخ نے کہا"ہم نے سلامتی کے تمام ضروری انتظامات کئے ہیں تاکہ یہ یقینی بنایا جاسکے کہ صورتحال پرامن رہے"۔
راجوری ، پونچھ میںووٹ شماری کیلئے5 مراکز قائم | حفاظتی انتظامات سخت ،نجی گاڑیوںسے سینکڑوںلاٹھیاں ضبط
