عظمیٰ نیوز ڈیسک
نئی دہلی// اب دہلی یونیورسٹی میں طلباء ایک ساتھ دو ڈگریاں لے سکیں گے۔ ڈی یو کی اکیڈمک کونسل نے حال ہی میں اس پلان کی منظوری دی ہے۔ اب یہ تجویز 27 جولائی کو ہونے والی ایگزیکٹو کونسل میں رکھی جائے گی۔ اس پروگرام میں طلباء بی اے پروگرام کے ساتھ آنرز کی ڈگری حاصل کر سکتے ہیں لیکن طلباء کو یہ دونوں کیلئے ڈی سے ہی داخلہ لینا ہوگا۔ ان میں سے ایک ڈگری ریگولر اور دوسری ڈگری کو فاصلاتی قرار دی جائے گی۔DU میں دوہری ڈگری کی تجویز 27 جولائی کو ہونے والی ایگزیکٹو کونسل میں رکھی جائے گی۔ اگر یہاں سے منظوری مل جاتی ہے، تو دوہری ڈگری پروگرام کے لیے روڈ میپ اور رہنما خطوط تیار کیے جائیں گے۔ اس کے بعد ہی ادارے میں دوہرے کورسز کے داخلے شروع کیے جائیں گے۔ ڈی یو اسکول آف اوپن لرننگ کے ڈائریکٹر پروفیسر۔ پائل ماگو نے بتایا کہ ایک ساتھ دو ڈگریاں حاصل کرنے کا نظام 25-2024 کے سیشن سے نافذ کیا جائے گا۔دوہری ڈگری کے تحت اگر کوئی طالب علم کالج کے آنرز پروگرام میں داخلہ حاصل کرنے سے قاصر رہتا ہے تو وہ اسکول آف اوپن لرننگ (ایس او ایل) کے آنرز کورس میں داخلہ لے سکتا ہے، لیکن یہ دونوں پروگرام ایک دوسرے سے الگ ہونے چاہئیں۔ اس طرح طلباء بی اے کے ساتھ آنرز کی ڈگری بھی حاصل کر سکیں گے۔
