عظمیٰ نیوز ڈیسک
دہلی//دہلی میں بارش اور موسم کی نمی کی وجہ سے ڈینگو، چکن گنیا اور مچھروں سے پھیلنے والی دیگر بیماریوں کا خطرہ بڑھ گیا ہے۔ اس کو روکنے کیلئے دہلی میونسپل کارپوریشن (ایم سی ڈی) نے پورے شہر میں اپنی مہم تیز کر دی ہے۔ اس کیلئے بڑے پپمانے پر جراثیم کش ادویات کا چھڑکائوکیا جا رہا ہے۔ اس کے علاوہ ایم سی ڈی کے ذریعے مچھروں سے پیدا ہونے والی بیماریوں پر قابو پانے کے لیے بہت سی احتیاطی تدابیر بھی اختیار کرنے کی ہدایت جاری کی گئی ہے۔اس ضمن میں ایک طرف جہاں مختلف مقامات پر لاروا چیک کیا جا رہا ہے اور ادویات کا چھڑکاؤ کیا جا رہا ہے تو دوسری جانب غفلت برتنے والوں اور خلاف ورزی کرنے والوں کے خلاف نوٹسز جاری کرنے کے علاوہ چالان کیا جا رہا ہے اور جرمانے بھی وصول کیے جا رہے ہیں۔ ایم سی ڈی کے مطابق اس سال اب تک 18019250 گھروں کے دورے کیے گئے ہیں تاکہ مچھروں کی افزائش کا پتہ لگایا جاسکے۔ 43650 گھروں میں مچھروں کی افزائش پائی گئی ہے۔ ایم سی ڈی نے 218415 گھروں میں کیڑے مار ادویات کا چھڑکاؤ کیا ہے۔ اس کے ساتھ ہی حساس مقامات جیسے نالوں، آبی ذخائر، تعمیراتی جگہوں، پارکوں، نرسریوں، اسپتالوں، اسکولوں اور سرکاری دفاتر وغیرہ میں مچھروں کی افزائش کو روکنے کے لیے خصوصی مہم چلائی گئی۔ایم سی ڈی نے ملیریا کی روک تھام قانون کے تحت مچھروں کی افزائش کو روکنے کے لیے قانونی کارروائی بھی کی ہے۔ اس کے تحت اب تک 39862 قانونی نوٹس جاری کیے جا چکے ہیں۔ جبکہ 9479 چالان جاری کیے گئے ہیں اور 2580 خلاف ورزی کرنے والوں پر 686105 روپے جرمانہ عائد کیا گیا ہے۔ ایم سی ڈی کے مطابق ایم سی ڈی کا پبلک ہیلتھ ڈپارٹمنٹ باقاعدگی سے تمام علاقوں میں اینٹی لاروا اقدامات کر رہا ہے۔ حکومت ہند کے ذریعہ چلائے جانے والے انٹیگریٹڈ ہیلتھ انفارمیشن پلیٹ فارم (آئی ایچ آئی پی) پورٹل کے ذریعے دہلی کے تمام ہیلتھ یونٹس سے ان معاملات کے بارے میں معلومات اکٹھی کی جاتی ہیں۔ ایم سی ڈی نے لوگوں سے اپیل کی ہے کہ وہ اپنے گھروں میں اور اس کے آس پاس پانی جمع نہ ہونے دیں، تاکہ مچھروں کی افزائش نہ ہو سکے۔
