دہلی میںزہریلی ہوا کا ستم برقرار | چندعلاقے ریڈ زون میں پہنچ گئے،کئی ریاستوں میں کہرا

عظمیٰ نیوز ڈیسک

نئی دہلی//دم گھونٹنے والی فضا میں سانس لیتی دہلی کے کئی علاقے بدھ کو بھی ریڈ زون میں پہنچ گئے۔ منگل کو تقریباً 29علاقے اسی خطرناک زمرے میں تھے۔ رپورٹ کے مطابق صبح 7 بجے جہانگیر پوری کا اے کیو آئی 999 ریکارڈ کیا گیا۔ منگل کو تقریبا تمام علاقوں میں اے کیو آئی 300 سے اوپر یعنی ‘انتہائی خراب’ درج کیا گیا، جبکہ 8 علاقے ایسے تھے جہاں اے کیو آئی 200 سے 300 کے درمیان یعنی ‘خراب’ زمرے میں رہا۔مرکزی آلودگی کنٹرول بورڈ(سی پی سی بی)کے مطابق دہلی کا اے کیو آئی 334 رہا، جس میں پیر کے مقابلے 18 پوائنٹس کی کمی درج کی گئی۔ ایک دن قبل اتنے ہی پوائنٹس کا اضافہ دیکھا گیا تھا۔ این سی آر کے شہروں میں بھی یہ اتار چڑھاو جاری ہے۔ ایئر کوالیٹی وارننگ سسٹم کے مطابق اگلے چھ دنوں کے دوران ہوا کی رفتار 8 سے 10 کلومیٹر فی گھنٹے سے نیچے رہے گی۔ موسمی حالات بھی ناموافق ہیں۔ اے کیو آئی 300سے اوپر ‘خراب زمرے’ میں ہی برقرار رہنے کا امکان ہے۔وہیں دہلی-این سی آر اور آس پاس کے علاقوں میں ٹھنڈ نے دستک دے دی ہے۔ رات سے ہی کئی علاقوں میں کہرا چھایا ہوا ہے۔ لوگوں کو ہلکی ہلکی ٹھنڈ کا احساس ہونے لگا ہے۔ اس کے علاوہ پنجاب، لدھیانہ اور بھٹنڈا میں بھی رات کے وقت کہرے کی چادر دیکھی گئی۔ نیوز ایجنسی اے این آئی کی رپورٹ کے مطابق آسام کے کچھ علاقوں میں بھی صبح میں کہرے کا احساس لوگوں کو ہوا جبکہ بہار میں بھی گاوں سے لے کر شہروں تک صبح کے وقت کہرا چھایا ہوا تھا۔ اتر پردیش اور دیگر میدانی ریاستوں میں بھی صبح میں کہرا چھایا رہا۔آئی ایم ڈی کے مطابق خلیج بنگال میں اس وقت تیز ہواوں کے داخلے کے لیے بہتر حالات پیدا ہو گئے ہیں۔ حالانکہ سردی کے موسم کی شروعات کا کوئی سرکاری اعلان ابھی تک نہیں کیا گیا ہے۔ یہاں رات کے وقت درجہ حرارت میں تھوڑی گراوٹ ضرور دیکھی گئی ہے۔ علی پور واقع محکمہ موسمیات نے کہا ہے کہ ہمالیائی علاقہ(شمال)اور بنگال کے گنگا علاقے (جنوب)میں رات کا درجہ حرارت دو سے تین ڈگری تک گر سکتا ہے۔