عظمیٰ نیوز سروس
ڈوڈہ//مرکزی وزیر مملکت ڈاکٹر جتیندر سنگھ نے کہا کہ جموں صوبہ میں پھیل رہی دہشت گردی سے نمٹنے کیلئے سیکورٹی ایجنسیوں کے پاس موثر حکمت عملی موجود ہے تاہم دیہی علاقوں میں ولیج ڈیفنس گارڈز انتہائی اہمیت کے حامل ہیں ۔ان خیالات کا اظہار موصوف نے ڈوڈہ میں ایک عوامی دربار کے دوران کیا ۔مرکزی وزیر نے کہاکہ ’’دہشت گردی کے حالیہ واقعات کے پیش نظر ضلع ڈوڈہ اور اس سے ملحقہ علاقوں میں سیکورٹی کی صورتحال کو کنٹرول کرنے کے لئے سیکورٹی ایجنسیوں کے پاس ایک حکمت عملی ہے، لیکن اس طرح کی حکمت عملیوں پر عوام میں بحث نہیں کی جاتی ہے‘‘۔ڈاکٹر جتیندر سنگھ نے کہا کہ ولیج ڈیفنس گارڈز (VDGs) کو عسکریت پسندی سے متاثرہ علاقوں میں دوبارہ زندہ کیا جا رہا ہے جس کا مقصد انہیں دہشت گردوں سے لڑنے کے لئے بااختیار بنانا ہے۔ مرکزی وزیر نے کہاکہ ’’حکومت نے یہ بھی فیصلہ کیا ہے کہ اگر اور جہاں بھی ضرورت ہو، ولیج ڈیفنس گارڈز کو دہشت گردوں کی طرف سے درپیش چیلنج کا مقابلہ کرنے کے لئے کثیر الجہتی حکمت عملی کے حصے کے طور پر تعینات کیا جائے گا’۔انہوں نے یہ بھی اعلان کیا کہ ایس ایل آر رائفلز سمیت ہتھیار ولیج ڈیفنس گارڈز کو فراہم کئے جا سکتے ہیں تاکہ وہ اس چیلنج سے مؤثر طریقے سے نمٹنے میں کامیاب ہو سکیں ۔وزیر نے تمام برادریوں سے دہشت گردی کے خلاف متحدہ محاذ قائم کرنے کی اپیل کی۔ انہوں نے یاد دلایا کہ ڈوڈہ نے 1990 کی دہائی کے دوران بھی دہشت گردی اتنا زیادہ نہیں رہا ہے ۔ڈوڈہ کے بنیادی ڈھانچے کی ترقی کے بارے میں بات کرتے ہوئے ڈاکٹر جتیندر سنگھ نے کہا کہ حکومت کے پچھلے دس سالوں میں، دور دراز کے علاقوں سے رابطے کو بہتر بنانے، سفر کے وقت کو کم کرنے اور مسافروں کے آرام کو بڑھانے کے لئے ہائی ویز کا ایک نیٹ ورک بنایا گیا ہے۔انہوں نے کہاکہ لکھن پور-بسوہلی-بنی- بھدرواہ-ڈوڈہ قومی شاہراہ اس راستے پر 100 کلومیٹر سے زیادہ فاصلہ کم کر دے گی۔ انہوں نے مزید کہا کہ اس سے مقامی نوجوانوں کے لئے روزگار کے مواقع پیدا ہوں گے اور سیاحت کو فروغ ملے گا۔مرکزی وزیر نے کہا کہ حکومت جموں و کشمیر کے تمام خطوں کی مساوی ترقی کو یقینی بنانے کے لئے انتھک محنت کر رہی ہے۔ مودی حکومت نے پچھلی حکومت کی خامیوں پر قابو پالیا اور جموں و کشمیر میں نامکمل اور تاخیر کا شکار بنیادی ڈھانچے کے منصوبوں کو مکمل کیا۔ڈاکٹر جتیندر سنگھ نے حکومت کی فلاحی اسکیموں کے بارے میں بیداری پیدا کرنے کی ضرورت پر زور دیا۔بعد ازاں، مرکزی وزیر نے تین گھنٹے سے زائد جاری ایک ’’عوامی دربار‘‘ کا انعقاد کیا جس میں ڈپٹی کمشنر ہرویندر سنگھ کی قیادت میں ضلع انتظامیہ لوگوں کے مسائل کے موقع پر ازالہ کے لئے موجود تھی۔
