سولنکی ،وقار رسول وانی اور رمن بھلہ سمیت درجنوں لیڈران کو گرفتار کرنے کے بعد رہا کر دیا گیا
جموں//اے آئی سی سی انچارج جے کے امور بھرت سولنکی، جے کے پی سی سی کے صدر وقار رسول وانی کے ساتھ اے آئی سی سی سکریٹری منوج یادو، ورکنگ صدر رمن بھلہ، سابق ایم پی چودھری لال سنگھ، رویندر شرما، ملا رام، کی قیادت میں سینکڑوں کانگریسی کارکنوں نے جموں و کشمیر میں بڑھتی ہوئی دہشت گردی اور جموں و کشمیر کا ریاست کا درجہ جلد بحال کرنے کو لے کر جموں میں احتجاج کیا جس کے دوران انتظامیہ مخالف شدید نعرے بازی بھی کی گئی ۔ایل جی ہاؤس تک کانگریس کے مارچ کو ناکام بنانے کے لئے پولیس کو سخت مشکل پیش آئی، کیوں کہ مشتعل مظاہرین نے شہیدی چوک جموں سے لے کر رگھوناتھ بازار تک کئی مقامات پر پولیس کی رکائوٹیں توڑ دی اورانہوں نے رگھوناتھ مندر چوک پر ایک گھنٹے سے زیادہ دھرنا دیا۔پولیس نے کئی مقامات پر لاٹھی چارج کیا جس میں سینئر لیڈر ونود شرما نائب صدر پی سی سی سمیت کچھ لیڈر اور کارکن زخمی ہوئے۔جموں شہر میں کانگریسی کارکنوں کی جانب سے بڑھتی ہوئی دہشت گردی اور بی جے پی کی قیادت والی مرکزی حکومت کی ناکامی کے ساتھ ساتھ منتخب حکومت کے اختیارات چھیننے کے حالیہ حکم کی مخالفت کرنے اور ریاست کی بحالی کے مطالبے کے معاملے پر شہیدی چوک سے ایک زبردست احتجاجی مظاہرہ کیا گیا۔جموں صوبے کے مختلف علاقوں، بلاکس اور اضلاع سے تعلق رکھنے والی خواتین سمیت پی سی سی، ڈی سی سی، فرنٹل ونگ کے سینئر کانگریس لیڈروں اور کارکنوں کی بڑی تعداد نے احتجاج میں حصہ لیا۔مظاہرین نے بڑھتے ہوئے دہشت گردانہ حملوں اور دہشت گردانہ سرگرمیوں میں اضافہ اور فوجیوں کی شہادت کے لئے مرکز کی بی جے پی حکومت اور یوٹی انتظامیہ کے خلاف سخت نعرے بازی کی۔ انہوں نے اسمبلی انتخابات سے عین قبل منتخب حکومت کے اختیارات چھیننے اور لیفٹیننٹ گورنر کو دینے کے حالیہ حکم پر تنقید کی۔ انہوں نے ریاستی حیثیت کی فوری بحالی اور ریاستی حیثیت کے تحت اسمبلی انتخابات کے انعقاد کا مطالبہ کیا۔احتجاج کے دوران میڈیا کے نمائندوں سے بات کرتے ہوئے سولنکی نے کہا کہ مودی کی قیادت والی بی جے پی حکومت دہشت گردی پر قابو پانے میں مکمل طور پر ناکام رہی ہے خاص طور پر جموں خطہ جو پہلے پرامن تھا لیکن جموں میں دہشت گردی بہت حد تک بڑھ چکی ہے۔ انہوں نے کہاکہ ’’جوان شہید ہو رہے ہیں اور حکومت کہتی ہے کہ حالات معمول پر آ گئے ہیں‘‘۔دہشت گردی پر قابو پانے اور جمہوریت کو بحال کرنے میں مکمل ناکامی پر بی جے پی حکومت پر سخت تنقید کرتے ہوئے جے کے پی سی سی کے صدر وقار رسول وانی نے کہا کہ ’’بی جے پی نے لوک سبھا انتخابات میں ملک بھر میں حالات معمول پر لانے کا دعویٰ کیا۔ جموں خطہ میں پچھلے دو سالوں کے دوران حالات خراب ہوئے ہیں جس کی وجہ سے ہماری افواج کا بہت زیادہ نقصان ہوا ہے‘‘۔انہوں نے کہا کہ یوٹی کے پانچ سال کے بعد، صورتحال بدترین ہے، لہذا ریاستی حیثیت کو بحال کیا جائے اور لوگوں کو حکمرانی کے اختیارات بحال کئے جائیں ۔رمن بھلہ نے جموں خطے کی بدترین صورتحال کے لئے مرکز حکومت اور یوٹی انتظامیہ پر بھی تنقید کی جو کہ قوم کے لئے تشویش کا باعث ہے۔
