دھوکہ دہی کا الزام | پوجا کھیڈکر کے خلاف کارروائی شروع، ایف آئی آر درج

نئی دہلی/یواین آئی/ یونین پبلک سروس کمیشن (یو پی ایس سی) نے جمعہ کے روز ٹرینی آئی اے ایس آفیسر پوجا کھیڈکر کے خلاف ایف آئی آر درج کرانے کے ساتھ ہی سول سروسز کی ان کی امیدواری رد کرنے کے لیے وجہ بتاؤ نوٹس جاری کیا۔ایک سرکاری بیان کے مطابق، UPSC نے سول سروسز امتحان-2022 کی عارضی سفارش کردہ امیدوار، محترمہ پوجا منورما دلیپ کھیڈکر کی غلط کاری کی تفصیلی اور مکمل تحقیقات کی ہے۔اس تفتیش سے یہ بات سامنے آئی ہے کہ اس نے اپنا نام، اپنے والد اور والدہ کا نام، اپنی تصویر/دستخط، ای میل آئی ڈی، موبائل نمبر اور ایڈریس کو تبدیل کرکے اپنی فرضی شناخت بنا کر امتحانی قواعد کے تحت قابل قبول حد سے تجاوز کرنے کی کوشش کی۔ اس نے فرضی شناخت کے ذریعہ امتحان دینے کی جائز حد کو پار کیا ہے۔یو پی ایس سی نے مزید کہا کہ اس نے پولیس ایف آئی آر درج کراکے اس کے خلاف کارروائیوں کا سلسلہ شروع کیا ہے اور سول سروسز کی اس کی امیدواری کو منسوخ کرنے کے لیے وجہ بتاؤ نوٹس (ایس سی این) جاری کیا ہے۔ سول سروسز ایگزامینیشن-2022 کے قواعد کے مطابق یو پی ایس سی امتحان-2022، مستقبل کے دیگر امتحانات سے باز رکھنے کے لیے کارروائی کی گئی ہے۔