ایجنسیز
لندن //برطانیہ میں ہونے والے انتخابات میں واضح اکثریت حاصل کرنے والی لیبر پارٹی کے سربراہ کیئر اسٹارمر نے کہا ہے کہ میںنے ملک میں حکومت بنانے کی دعوت قبول کی ہے۔نومنتخب وزیراعظم، لیبر پارٹی کے سربراہ سر کیئر اسٹارمر شاہی محل برہنگم پیلس میں برطانوی بادشاہ سے ملاقات کے بعد سرکاری رہائش گاہ ٹین ڈاننگ اسٹریٹ پہنچے جہاں ان کا شاندار استقبال کیا گیا۔ قوم سے اپنا پہلا خطاب کرتے ہوئے انہوں نے کہا کہ ان کی حکومت ہر شہری کو احترام کی نظر سے دیکھیگی، میری حکومت عوام کی خدمت کریگی۔کیئر اسٹارمر نے کہا کہ ہمارے ملک کو ایک بڑے ری سیٹ کی ضرورت ہے، ہم کون ہیں، ہمیں یہ دریافت کرنا ہوگا۔انہوں نے کہا کہ ایک ملک میں تبدیلی لانا کسی سوئچ بٹن کو دبانے کے مترادف نہیں ہے، دنیا اب زیادہ غیر مستحکم جگہ بن چکی ہے، اس لیے برطانیہ میں تبدیلی لانے کے لیے وقت لگے گا۔کیئر اسٹارمر کا مزید کہنا تھا کہ ہمیں تبدیلی کے لیے فوری طور پر کام شروع کرنا ہوگا، ہمیں کوئی شک نہیں کہ ہر ملک کی ہر کمیونٹی کی مدد سے برطانیہ کو دوبارہ سے تعمیر کرنے کے لیے ہر ممکن کوشش کریں گے۔ان کا کہنا تھا کہ ہماری حکومت ان لوگوں کی بھی خاص طور پر خدمت کرے گی جنہوں نے ہمیں ووٹ نہیں دیا، ہمیں آگے بڑھنے کی ضرورت ہے۔ان کا کہنا تھا کہ ہمارے ملک نے تبدیلی کے لیے فیصلہ کن ووٹ دئیے۔برطانوی وزیر اعظم نے کہا کہ دنیا کو سنگین چیلنجز کا سامنا ہے، برطانیہ کوایک بارپھر رہنمائی کرنے والا ملک بنائیں گے۔برطانیہ میں 4 جولائی 2024 کو ہونے والے انتخابات میں لیبر پارٹی نے واضح اکثریت حاصل ہے جس کے بعد پارٹی کے سربراہ کیئر اسٹارمر رشی سوناک کی جگہ برطانیہ کے وزیرِ اعظم بن گئے ہیں۔لیبر پارٹی نے پارلیمنٹ کی 650 نشستوں میں سے ہاس آف کامنز میں 410 سیٹیں حاصل کی ہیں جب کہ کنزرویٹو پارٹی نے 118 نشستیں جیتی ہیں۔
