عظمیٰ نیوز سروس
نئی دہلی// آرٹیکل 370کے فیصلے کیخلاف سپریم کورٹ میں نظرثانی کے لئے درخواستیں دائر کی گئی ہیں۔ درخواستوں میں سپریم کورٹ کے اس فیصلے کو چیلنج کیا گیا ہے جس نے آئین کے آرٹیکل 370کو منسوخ کرنے کے مرکزی حکومت کے 2019 کے فیصلے کی درستگی کو برقرار رکھا، جس میں جموں و کشمیر کو خصوصی درجہ دیا گیاتھا۔ پیپلز موومنٹ صدر ڈاکٹر حسین اور عوامی نیشنل کانفرنس صدر مظفر شاہ نے کہا کہ انہوں نے سپریم کورٹ میں نظرثانی کی درخواستیں دائر کی ہیں۔ مظفر شاہ نے کہا کہ آرٹیکل 370 کو ختم نہیں کیا جا سکتا، ہم نے آرٹیکل 370 پر سپریم کورٹ کے فیصلے کے خلاف نظرثانی کی درخواست دائر کی ہے، ہم اس پر عدالت میں بحث کریں گے۔
سی پی آئی(ایم) کے محمد یوسف تاریگامی، نیشنل کانفرنس، ایڈوکیٹ مظفر اقبال اور پی ڈی پی نے بھی نظرثانی کی درخواستیں دائر کی ہیں۔پچھلے مہینے، پانچ ججوں کی آئینی بنچ نے آرٹیکل 370کی منسوخی کے بارے میں مرکز کے فیصلے کو برقرار رکھتے ہوئے کہا تھا کہ آرٹیکل 370 ایک “عارضی انتظام” ہے۔چیف جسٹس آف انڈیا ڈی وائی چندر چوڑ، جسٹس سنجے کشن کول، سنجیو کھنہ، بی آر گاوئی اور سوریہ کانت پر مشتمل پانچ ججوں کی آئینی بنچ نے کہا کہ آرٹیکل 370 ریاست میں جنگ کے وقت کے حالات کی وجہ سے نافذ کیا گیا تھا اور اس کا مقصد ایک عبوری مقصد کو پورا کرنا تھا۔عرضی گزاروں نے، آرٹیکل 370 کی منسوخی کو چیلنج کرتے ہوئے کہا تھا کہ آرٹیکل 370 اب کوئی “عارضی انتظام” نہیں ہے اور جموں و کشمیر کی آئین ساز اسمبلی کی تحلیل کے بعد اس نے مستقل طور پر کام سنبھال لیا ہے۔سپریم کورٹ نے کہا کہ ریاست جموں و کشمیر نے یونین آف انڈیا میں شامل ہونے پر خودمختاری کا عنصر برقرار نہیں رکھا۔عدالت عظمی نے کہا کہ اگرچہ ریاست کے سابق حکمران مہاراجہ ہری سنگھ نے اعلان کیا تھا کہ وہ اپنی خودمختاری برقرار رکھیں گے، لیکن ان کے جانشین کرن سنگھ نے ایک اور اعلان جاری کیا کہ ہندوستانی آئین ریاست کے دیگر تمام قوانین پر غالب رہے گا۔اس میں مزید کہا گیا، “اعلان جموں و کشمیر کی طرف سے، اس کے خود مختار حکمران کے ذریعے، ہندوستان کو اپنے لوگوں کو جو خودمختار ہیں، کی خودمختاری کے مکمل اور آخری ہتھیار ڈالنے کی عکاسی کرتا ہے۔”عدالت عظمی نے کہا کہ محض اس لیے کہ آئین ساز اسمبلی کا وجود ختم ہو گیا، اس کا یہ مطلب نہیں کہ دفعہ 370مستقل طور پر جاری رہے گی۔ سپریم کورٹ نے مزید کہا کہ صدر کو آرٹیکل 370کو منسوخ کرنے کا حکم جاری کرنے کا اختیار دیا گیا تھا۔
