عظمیٰ ویب ڈیسک
واشنگٹن/امریکی صدر ڈونلڈ ٹرمپ نے کہا ہے کہ غزہ امن منصوبےکی تجاویز پر اسرائیل اور عرب رہنماؤں نے بہت اچھا رد عمل ظاہر کیا ہے۔امریکی صدر کا کہنا تھا کہ تمام لوگ معاہدہ کرنا چاہتے ہیں، نیتن یاہو سے ملاقات میں معاہدے کو حتمی شکل دیے جانے کی امید ہے، انہوں نے بتایا کہ تجاویز کا مقصد صرف غزہ میں نہیں بلکہ مشرق وسطیٰ میں وسیع امن تک پہنچنا ہے۔
امریکی صدر نے کہا کہ تمام فریق پہلی بار کسی خاص مقصد کے لیے متحد ہیں، پہلی بار کچھ خاص ہونے جا رہا ہے۔ ان کا کہنا تھا کہ یہ معاہدہ ضرور مکمل کیا جائے گا اور ہم یہ کر کے دکھائیں گے۔رپورٹس کے مطابق امریکی صدر ڈونلڈ ٹرمپ کی آج وائٹ ہاؤس میں اسرائیلی وزیراعظم سے ملاقات ہوگی، امریکی حکام کے مطابق ملاقات کا مقصد جنگ بندی معاہدے کا فریم ورک طے کرنا ہے۔
دوسری جانب نائب امریکی صدر جے ڈی وینس نے بتایا کہ امریکی حکام اسرائیلی اور عرب رہنماؤں کے ساتھ انتہائی پیچیدہ مذاکرات میں مصروف ہیں۔یاد رہے کہ امریکی صدر ڈونلڈ ٹرمپ نے 2 روز قبل بھی غزہ جنگ بندی اور یرغمالیوں کی رہائی کا معاہدہ جلد ہونے کا دعویٰ کیا تھا۔امریکی صدر نے صحافیوں سے گفتگو میں کہا تھا کہ وہ غزہ جنگ کے خاتمے اور یرغمالیوں کی رہائی کے لیے ایک معاہدے کے قریب پہنچ گئے ہیں۔
