عظمیٰ نیوز سروس
سرینگر //زرعی پیداوار ، دیہی ترقی ، پنچائتی راج ، کواپریٹو اور الیکشن محکموں کے وزیر جاوید احمد ڈار نے پیر کوزرعی یونیورسٹی( سکاسٹ ) کشمیر میں خزاں کے پھولوں کا تہوار کا افتتاح کیا ۔ اس موقع پر خطاب کرتے ہوئے وزیر نے یونیورسٹی انتظامیہ کو خاص طور پر فلوریکلچر فیکلٹی کو اس رنگین تقریب کے انعقاد پر مبارکباد دی، جو کشمیر کی پھولوں کی تنوع اور فنکارانہ روایات کو منانے کا ذریعہ ہے ۔ انہوں نے کہا کہ یہ تہوار کشمیر کی فطری خوبصورتی کو نمایاں کرنے کا مقصد ہے جبکہ سیاحوں ، طلبہ اور کاروباری افراد کو خطے میں فلوریکلچر کی وسیع صلاحیتوں کی تلاش کی دعوت دیتا ہے ۔ تقریب کی اہمیت کو اجاگر کرتے ہوئے جاوید ڈار نے کہا کہ 15 مقامی
اقسام اور 80 سے زائد رنگوں کے کرسنتھیم پر مشتمل خزاں کا پھولوں کا تہوار ، وادی میں خزاں سیاحت کو فروغ دینے کی پہلی بڑی کوشش ہے ، جو خطے کی روائتی بہار ، گرمیوں اور سردیوں کی کششوں کا ساتھ دیتی ہے ۔ وزیر نے زور دیا کہ یہ اقدام حکومت کی وسیع تر ویژن سے ہم آہنگ ہے جس کا مقصد سیاحت کی تنوع اور زراعت اور اس سے جڑے شعبوں کے ذریعے روز گار کے مواقع پیدا کرنا ہے ۔ انہوں نے کہا کہ زرعی پیداوار محکمہ کسانوں کو اپنی معمول کی کاشتکاری کے ساتھ فلوریکلچر کو ایک قابل عمل کاروباری سرگرمی کے چور پر اپنانے کی ترغیب دے رہا ہے کیونکہ اس کی بڑھتی ہوئی مارکیٹ کی طلب اور برآمد کی صلاحیت ہے ۔
