عاصف بٹ
کشتواڑ//ہر سال کی طرح امسال بھی ضلع کشتواڑ میں حضرت شاہ فریدالدین بغدادیؒکے فرزند حضرت شاہ اسرارادین ولی بغدادیؒ کا350واں عرس پاک نہایت ہی عقیدت و احترام کے ساتھ منایا گیا جس میں ہزاروں کی تعداد میں لوگوں نے شرکت کی ۔ ہزاروں کی تعداد میں عقیدت مند ملک کے کونے کونے سے آئے اور یہاں منعقد ہونے والی تقریبات میں شرکت کی ۔سب سے بڑی تقریب کا اہتمام حضرت شاہ اسرارالدین بغدادیؒ کے آستان عالیہ پر انجام دی گئی جہاں نعت خوانی و درودازکار کی محفلوں کا اہتمام کیا گیا۔ امسال زائرین کی بڑی تعدادنے شرکت کی جبکہ مقامی لوگوں کی بڑی تعداد بھی شریک ہوئی اور گزشتہ دو روز سے لوگ درگاہوں کا مسلسل رخ کررہے ہیں ۔کشمیر سے بھی سینکڑوں زائرین نے درگاہ میں حاضری دی ۔علمائے کرام نے شاہ اسرارالدین ولیؒ کی زندگی پر روشنی ڈالی اور لوگوںکو شاہ اسرارالدین ؒکے تبرکات سے واقف کرایا گیا ۔ نماز ظہرکے بعد تبرکات کی زیارت کرائی گی جس میں بڑی تعداد میں مرد وزن شامل ہوئے۔
اس موقعہ پر مقررین نے بتایا کہ شاہ اسرارلدین ولی ؒآپسی بھائی چارے کی مثال مانے جاتے تھے اور انکے کئی قصے کافی مشہور ہیں۔ جہاں پچھلے کئی روز سے عقیدتمندوں کی بڑی تعداد زیارت کا رخ کررہی تھی اور کئی روز سے شاہ فریدالدین بغدادیؒ و شاہ اسرالدین بغدادی ؒکی زیارت گاہوں پر درودازکار کی محفلیں آرستہ کی جارہی تھیں وہی آج بھی نماز فجر سے درود و ختمات کی مجالس منعقد ہوئیں جسکے بعد نعت خوانی و تلاوت پاک کی گئی جو نماز فجر تک جاری رہی۔ نماز کے بعد درگاہ میں دوبارہ محفلیں شروع ہوئیں جو عصر تک جاری رہیں ۔بعد نماز مغرب درودازکار کی مجلس منعقد ہوئی جو نماز عشا تک جاری رہی جسکےبعد لوگوں نے رات بھر درگاہ میں شب خوانی میں گزاری اور یہ سلسلہ نماز فجر تک جاری رہا جبکہ نماز فجر کے بعد درودختمات کی مجلس کے ساتھ ہی اختتام پزیر ہوگا ۔اس دوران شاہ فریدالدین بغدادی ؒکے آستان عالیہ پر بھی عقیدتمندوں نے حاضری دی۔ وقف بورڈ کی طرف سے عقیدتمندوں کیلئے کھانے پینے و قیام گاہ کا بھی اہتمام کیا گیاتھا ۔اسکے علاوہ بھی مقامی لوگوں کی طرف سے آستان پائین میں کھانے پینے کا انتظام رکھا گیا تھا۔ ضلع بھر میں عرس کے موقع پر حفاظت کے سخت انتظامات کیے گئے تھے اور جگہ جگہ پولیس و پیراملٹری فورس کے اہلکار تعینات کئے گئے تھے تاکہ کوئی بھی ناخوشگوار واقعہ پیش نہ آئے۔
