جموں کشمیر کیلئے 32 ہزار کروڑ روپے ترقیاتی پروجیکٹوں کا افتتاح اور سنگ بنیاد

JAMMU, FEB 20 (UNI):- Prime Minister Narendra Modi dedicates to the nation and lays the foundation stone of multiple development projects, in Jammu on Tuesday. UNI PHOTO-70U

 یو این آئی

جموں// وزیر اعظم نریندر مودی نے 32 ہزار کروڑ روپیوں سے زیادہ کی لاگت کے تعلیم، ہوا بازی اور سڑک جیسے شعبوں سمیت متعدد ترقیاتی پروجیکٹوں کا افتتاح کیا۔انہوں نے جموں سے ملک بھر کیلئے ساڑھے 13 ہزار کروڑ روپیوں کی مالیت کے پروجیکٹوں کا افتتاح کیا اور سنگ بنیاد بھی رکھا۔وزیر اعظم نے جن پروجیکٹوں کا افتتاح کیا ان میں انڈین انسٹی ٹیوٹ آف ٹیکنالوجی (آئی آئی ٹیز)، انڈین انسٹی ٹیوٹ آف منیجمنٹ (آئی آئی ایمز) اور سینٹرل یونیورسٹیاں شامل ہیں۔انہوں نے جموں وکشمیر کے حال ہی میں بھرتی ہونے والے قریب 15 سو ملازمین میں تقرری کے خطوط تقسیم کئے اور وکست بھارت، وکست جموں پروگرام کی مختلف اسکیموں کے تحت استفادہ کنندگان سے بات چیت بھی کی۔نریندر مودی نے ریل وے پروجیکٹوں کا افتتاح کیا۔

 

نریندر مودی نے ملک کے تین نئے آئی آئی ایمز کا بھی افتتاح کیا جن میں آئی آئی ایم جموں، آئی آئی ایم بودھ گیا اور آئی آئی ایم وشاکھا پٹنم شامل ہیں علاوہ ازیں انہوں نے کیندریہ ودیالیوں کے لئے 20 نئی عمارتوں اور ملک بھر میں جواہر نوودیا ودیالیوں کی 13 نئی عمارتوں کا بھی افتتاح کیا۔جموں وکشمیر کے لوگوں کو جامع طبی نگہداشت کی خدمات فراہم کرنے کے لئے انہوں نے آل انڈیا انسٹی ٹیوٹ آف میڈیکل سائنسز وجے پور سانبہ کا افتتاح کیا۔دیگر پروجیکٹوں کے علاوہ وزیر اعظم نے جموں ہوائی اڈے پر ایک نئی ٹرمینل عمارت کا سنگ بنیاد رکھا۔انہوں نے جموں کو کٹرہ سے جوڑنے والے 44.22 کلو میٹر طویل دہلی – امرتسر – کٹرہ ایکسپریس وے کے دوسرے اسٹریچ اور سرینگر رنگ روڈ کو فور لین کرنے کے دوسرے مرحلے ، 161کلو میٹر سرینگر بارہمولہ اوڑی سیکشن،کولگام بائی پاس اور پلوامہ بائی پاس کی تعمیرسمیت کئی دوسرے اہم سڑک پروجیکٹوں کا سنگ بنیاد رکھا۔وزیر اعظم نے جموں میں سی یو ایف (عام صارف کی سہولیت) کے پٹرولیم ڈپو کو بھی تیار کرنے کے منصوبے کا سنگ بنیاد بھی رکھا۔