جموں کشمیر میں صرف 1کورونامتاثر

پرویز احمد
سرینگر //2سال کے بعد پہلی مرتبہ جموں کشمیر میں کورونا کا صرف ایک کیس سامنے آیا ہے۔یہ کیس سرینگر سے نکلا ہے جبکہ جموں کشمیر کے 19اضلاع میں کوئی متاثر نہیں ہوا اور نہ کسی کی موت واقع ہوئی۔ جموں صوبے کے 10اضلاع میں ایک مرتبہ پھر کسی کی رپورٹ مثبت نہیں آئی جبکہ کشمیر میں ایک شخص کی رپورٹ مثبت آئی۔پچھلے 24گھنٹوں کے دوران کورونا وائرس کے18ہزار 545ٹیسٹ کئے گئے ۔ متاثرین کی مجموعی تعداد 4لاکھ 53ہزار 956ہوگئی ہے۔ اس دوران جموں و کشمیر میں کسی کی موت نہیں ہوئی ۔ متوفین کی مجموعی تعداد 4751بنی ہوئی ہے۔ محکمہ صحت کی جانب سے فراہم کئے گئے اعداد و شمار کے مطابق جموں صوبے میں کورونا وائرس سے کوئی بھی شخص متاثر نہیں ہوا ہے جبکہ کشمیر میں 1شخص کو مثبت قرار دیا گیا ہے۔ جموں صوبے کے 10اضلاع  جن میں ضلع جموں، ادھمپور، پونچھ، راجوری ، ڈوڈہ ، کٹھوعہ ، کشتواڑ، سانبہ ، رام بن اور ریاسی میں کسی کی رپورٹ مثبت آئی ہے ۔ جموں صوبے میں متاثرین کی مجموعی تعداد 1لاکھ 66ہزار 286ہوگئی ہے۔ اس دوران جموں صوبے میں مسلسل چوتھے دن بھی کورونا وائرس سے کسی کی موت نہیں ہوئی ہے۔ جموںصوبے میں متوفین کی مجموعی تعداد 2328بنی ہوئی ہے۔ کشمیر صوبے کے 9اضلاع جن میں بارہمولہ، بڈگام، پلوامہ ، اننت ناگ، کپوارہ، بانڈی پورہ، گاندربل ، شوپیان اور کولگام میں کسی کی رپورٹ مثبت نہیں آئی ہے جبکہ ضلع سرینگر میں ایک شخص کو مثبت قرار دیا گیا ہے جو مقامی سطح پر رابطے میں آنے کی وجہ سے متاثر ہوا ہے۔ کشمیر میں متاثرین کی مجموعی تعداد 2لاکھ 87ہزار 670ہوگئی ہے۔ اس دوران کشمیر صوبے میں کورونا وائرس سے مسلسل 46ویں دن بھی کسی کی موت نہیں ہوئی ہے۔ متوفین کی مجموعی تعداد 2423بنی ہوئی ہے۔ 

 

 

ملک میں 2,067 مثبت،40 ہلاکتیں

یو این آئی

 

نئی دہلی// ملک بھر میں کورونا انفیکشن کے بڑھتے ہوئے معاملات کے درمیان گزشتہ 24 گھنٹوں میں40 افرادکی موت ہوئی ، جس سے ملک میں مرنے والوں کی کل تعداد 5,22,006 ہو گئی ہے۔ خاندانی بہبود کی مرکزی وزارت نے کہا کہ کووڈ انفیکشن کے 2067 نئے مریض سامنے آئے ہیں۔ اس کے ساتھ ہی ملک کے مختلف اسپتالوں میں زیر علاج کورونا مریضوں کی تعداد 13,927 ہو گئی ہے۔