عظمیٰ نیوز سروس
سرینگر/جموں و کشمیر میں شدید سردی کی صورتحال برقرار ہے اور پوری وادی میں درجہ حرارت نقطہ انجماد سے کئی ڈگری نیچے ہے۔ جموں و کشمیر کی گرمائی دارالحکومت کا درجہ حرارت منفی 3.5 ڈگری سیلسیس ریکارڈ کیا گیا۔محکمہ موسمیات نے بتایا کہ سرینگر میں کم از کم درجہ حرارت پچھلی رات منفی 5.4 ڈگری تھا۔ انہوں نے کہا کہ قاضی گنڈ میں گزشتہ رات منفی 2.8 ،پہلگام میں منفی 5.0 ، کوکرناگ میںمنفی 1.9 ، کپواڑہ قصبے میں، منفی 4.2 ،اور گلمرگ میں 3.44 ڈگری سینٹی گریڈ ریکارڈ کیا گیا۔انہوں نے کہا کہ جموں میں گزشتہ رات 7.3 ریکارڈ کیا گیا، بانہال میں درجہ حرارت 1.7 ، بٹوٹ میں 4.2 اور بھدرواہ میں 0.4 ڈگری سینٹی گریڈ ریکارڈ کیا گیا۔محکمہ موسمیات سرینگر کے ڈائریکٹر مختار احمد کا کہنا ہے کہ وادی کشمیر میں آنے والے دنوں کے دوران سردی کی لہر تیز تر ہونے کا امکان ہے۔انہوں نے صبح کے وقت گھروں سے نکلنے والے لوگوں خاص کر ٹیویشن کے لئے جانے والے بچوں سے تاکید کی کہ وہ ماسک لگا کر ہی گھروں سے باہر نکلیں۔موصوف ڈائریکٹر نے جمعہ کے روزبتایا’آنے والے دنوں کے دوران سردی میں مزید اضافہ درج ہونے کا امکان ہے’۔انہوں نے کہا ‘سرینگر اور ملحقہ علاقوں میں شبانہ درجہ حرارت منفی 6 ڈگری سینٹی گریڈ جبکہ پہاڑی علاقوں میں منفی 7 سے 8 ڈگری سینٹی گریڈ ریکارڈ ہوسکتا ہے’۔ان کا کہنا تھا کہ وادی میں 24 دسمبر تک دھند جاری رہ سکتی ہے اور پولوشن لوڈ بھی بڑھ سکتا ہے۔ مختار احمد نے کہا کہ وادی میں صبح اور شام کے وقت روشنی کی کمی کے پیش نظر گاڑیاں چلانے میں احتیاط سے کام لینا چاہئے۔موصوف ڈائریکٹر نے کہا کہ وادی میں فی الوقت بڑے پیمانے پر موسم خراب ہونے کا کوئی امکان نہیں ہے۔انہوں نے کہا کہ پہاڑی علاقوں میں بھی ابھی نہ ہونے کے برابر برف باری ہوئی ہے۔انہوں نے کہا کہ 24 دسمبر تک جموں و کشمیر میں بنیادی طور پر خشک اور سرد موسم رہے گا۔16 دسمبر کو موسم عام طور پر ابر آلود رہے گا اور بالائی علاقوں میں ہلکی برفباری کا امکان ہے۔17 سے 24 دسمبر تک، “بنیادی طور پر خشک موسم” کی پیش گوئی ہے۔
