عظمیٰ نیوز سروس
جموں //بی جے پی کے قومی جنرل سکریٹری ترون چْگ جو جموں و کشمیر کے پارٹی انچارج بھی ہیں، نے یونین ٹیریٹری کے لوگوں سے عبداللہ، مفتیوں اور گاندھی نہرو خاندانوں کو جموں و کشمیر کی سیاست سے باہر کرنے کی اپیل کرتے ہوئے کہا کہ تینوں خاندانوں نے اپنے سیاسی مفادات کو فروغ دینے کے لئے جموں و کشمیر کی ثقافت اور معیشت کو مکمل طور پر تباہ کر دیا ہے۔ انہوں نے سرحد پار فورسز کی فعال مدد سے جموں و کشمیر کو ملک کے دہشت گرد دارالحکومت میں تبدیل کر دیا۔ انہوں نے کہاکہ عبداللہ تقریباً ہر دوسرے دن پاکستان کی قسمیں کھاتے ہیں ۔انہوں نے کہاکہ آنے والے انتخابات میں ان تینوں پارٹیوں کو دروازہ دکھا کر جموں و کشمیر کی سیاست سے بے دخل کر دیا جائے جو کہ ان تمام سالوں سے پاکستانی افواج کی جانب سے عوام کی قسمتوں کو تباہ کرنے اور ان کا استحصال کر رہے ہیں۔چْگ نے کہا کہ مودی حکومت نے جموں و کشمیر کے نوجوانوں اور خواتین کو ایک نیا وژن دیا ہے جو اب اپنی ترقی کے لئے کام کرنا اور اپنے خوابوں کو پورا کرنا چاہتے ہیں۔انہوں نے کہا کہ دہشت گردی سے لے کر سیاحت تک جموں و کشمیر نے مودی حکومت کے تحت اپنی ثقافت میں بڑی تبدیلی دیکھی ہے۔ انہوں نے مزید کہا کہ اگرچہ پاکستان کی سرپرستی میں موجود قوتیں ہیں جو اب بھی جموں و کشمیر میں امن کو خراب کرنے کی کوشش کر رہی ہیں، لیکن آنے والے دنوں میں ان کے ساتھ سختی سے نمٹا جائے گا اور ان کے مذموم عزائم کو فیصلہ کن طور پر شکست دی جائے گی۔
