عظمیٰ نیوز سروس
راجوری//بھارتیہ جنتا پارٹی (بی جے پی) کیڈر سے لوگوں کے مسائل کو حل کرنے کے مقصد سے زیادہ جوش و جذبے کے ساتھ کام کرنے کو کہتے ہوئے، بی جے پی کے سنیئر لیڈر رویندر رینہ نے اتوار کو کہا کہ وہ وزیر اعلیٰ جیسے پہلے کام کے مقابلے میں اب گورنر کی طرح کام کریں گے۔رینہ نوشہرہ میں منعقدہ بی جے پی کے ورکرز کنونشن سے خطاب کر رہے تھے۔بی جے پی نے اُسے ’’شکریہ‘‘ کنونشن قرار دیا جس کا مقصد بی جے پی کو بھاری تعداد میں ووٹ دینے کے لئے لوگوں کا شکریہ ادا کرنا تھا جو کہ نوشہرہ اسمبلی حلقہ سے جیت درج کرنے میں ناکام رہی کیونکہ اس کے ریاستی صدر رویندر رینہ این سی کے سریندر چودھری سے ہار گئے۔اس کنونشن سے خطاب کرتے ہوئے رویندر رینہ نے کہا کہ انتخابات میں ہار یا جیت ان کے عوامی ترقی کے نقطہ نظر پر زیادہ اثر نہیں ڈالے گی۔موصوف نے کہاکہ ’’پہلے وزیر اعلیٰ کی طرح کام کرتا تھا اور اب گورنر کی طرح کام کروں گا‘‘۔ انہوں نے مزید کہا کہ ’’میری ترقی اور اپنے عوام کی فلاح و بہبود کیلئے جدوجہد جاری رہے گی۔‘‘رینہ ،جن کے نقصان کو پارٹی کے لئے بڑا دھچکا قرار دیا جا رہا ہے، نے کہا کہ ترقی کو اب ترجیح ہونی چاہیے اور سیاست کو ایک طرف رکھنا چاہیے۔رینہ نے مزید کہا کہ ہم انتخابی سیاست کو ایک طرف رکھتے ہوئے اب صرف ترقی کے لئے کام کریں گے جو اگلے انتخابات سے پہلے چھ ماہ تک کریں گے۔انہوں نے نوشہرہ کے ووٹرز کا بھی شکریہ ادا کیا جنہوں نے حالیہ انتخابات کے دوران بڑی تعداد میں ووٹ ڈالے۔
