محمد تسکین
بانہال// ہفتے کی شام جموں سرینگر قومی شاہراہ پر چملواس کے نزدیک پولیس گاڑی کوپیش آئے ایک حادثے میں جموں وکشمیر آرمڈ پولیس کے 4اہلکار زخمی ہو گئے جن کو علاج معالجہ کیلئے بانہال ہسپتال داخل کروایا گیا ۔پولیس نے بتایا کہ پولیس گاڑی زیر نمبر JK02 /4560 ڈوڈہ سے سرینگر کہ طرف آنے کے دوران بانہال سے قریب پانچ کلومیٹر پہلے چملواس کے نزدیک حادثے کا شکار ہو گئی ۔انہوں نے کہا کہ حادثے کی خبر ملتے ہی بانہال پولیس اور بانہال والنٹیئرس کے رضاکاروں نے مقامی لوگوں کے ساتھ ملکر بچاو کاروائیوں کو انجام دیا اور زخمیوں کو گاڑی سے نکال کر علاج معالجہ کیلئے سب ضلع ہسپتال بانہال منتقل کردیا ۔ہسپتال حکام نے بتایا کہ زخمیوں میں تین کو معمولی چوٹیں آئی ہیں جبکہ ایک زخمی کا بازو فریکچر ہوا ہے۔ انہوں نے ہسپتال لائے گئے زخمیوں کی شناخت عادل نذیر ولد نذیر احمد سکنہ حضرت بل سرینگر ، معراج الدین ولد عبدالرشید ولد نور باغ سرینگر ، سجاد احمد ولد اسد اللہ سکنہ قاضی گنڈ ، پرویز احمد ولد عبدالرشید سکنہ اننت ناگ کے طور کی ہے۔
