عاصف بٹ+ایم ایم پرویز
جموں//برائی پر اچھائی کی جیت کاتہوار دسہرہ بدھ کو پورے جموں خطہ میں مذہبی جوش و جذبے کے ساتھ منایا گیا۔
جموں
مرکزی تقریب پریڈ گراؤنڈ جموں میں منعقد ہوئی جہاں راون، اس کے بھائی کمبھ کرن اور بیٹے میگ ناتھ کے پتلے نذر آتش کیے گئے۔اس تقریب کا اہتمام سناتن دھرم سبھا نے کیا تھا۔
کشتواڑ
کشتواڑ ضلع کشتواڑ میں ہر سال کی طرح امسال بھی دسہرہ کا تہوار نہایت ہی عقیدت و احترام سے منایاگیا جس دوران ہزاروں کی تعداد میں لوگوں نے بڑھ چڑھ کر شرکت کی۔ تفصیلات کے مطابق ہزاروں کی تعداد میں لوگوں نے تاریخی چوگان گرائونڈ میں جمع ہوکر راون کے پتلےنذر آتش کئے۔ سناتن دھرم سبھا کشتواڑ و آدرش ڈرامیٹک کلب کی جانب سے دسہرہ کی تقریب کا اہتمام کیا گیا تھا ۔اس دوران رام کا جلوس آدرش ڈرامیٹک کلب دھرمشالہ سے نکالاگیاجس میںسینکڑوں کی تعداد میں مقامی لوگوں نے جھانکی کے ساتھ چوگان گراؤنڈ میں جمع ہوکر راون، کمبھ کرن اور میگ ناتھ کے پتلے نذرآتش کئے۔ ضلع کے دیگر مقامات پر بھی رام لیلا کا اہتمام کیا گیاتھا اور دسہرہ کی تقریب منائی گئی ۔ ضلع میں سب سے بڑی تقریب چوگان گرائونڈ میں ہوئی جہاں ضلع انتظامیہ کے ہمراہ پولیس نے بھی پروگرام میں شرکت کی ۔ ضلع بھر میں پولیس کی جانب سے حفاظت کے سخت انتظامات کئے گئے تھے اور پولیس کی اضافی نفری کو تعینات کیا گیا تھا۔
رام بن
ضلع رام بن میں دسہرہ کا تہوار ہفتہ کو ضلع بھر کے ہندوؤں نے مذہبی جوش و خروش کے ساتھ منایا۔یہ تہوار روایتی مذہبی رسومات کے ساتھ منایا گیا اور قصبے کے مختلف مندروں میں پوجا ارچناکی گئی۔اس سلسلے میں سناتن دھرم سبھا دسہرہ کمیٹی، رام ناٹک کلب اور آر ایس ایس یونٹ رام بن کی جانب سے گورنمنٹ ہائر سیکنڈری سکول گراؤنڈ رام بن میں ایک تقریب کا انعقاد کیا گیا جہاں راون، میگھناتھ اور کمبھ کرن کے پتلےنذر آتش کئےگئے۔تقریب میں بڑی تعداد میں عقیدت مندوں اور دیگر مذاہب سے تعلق رکھنے والے افراد نے شرکت کی۔ وجے دشمی اور راشٹریہ سویم سیوک سنگھ کے یوم تاسیس کے موقع پر، رضاکاروں نے رام بن کے مختلف علاقوں میں اپنا روایتی پیدل مارچ (پتھ سنچالن) بھی نکالا اور اپنے دفاع کی مہارت کا مظاہرہ کیا۔آر ایس ایس کے کیڈٹس کا مارچ پاسٹ (سنچالن) رام بن شہر سے ہوتا ہوا گورنمنٹ ماڈل ہائر سیکنڈری سکول سے میترا تک اور پیچھے سے نکلا۔ شستر پوجن کا انعقاد کیا گیا۔مارچ کے بعد، ایک اسمبلی (شاکھا) کا انعقاد کیا گیا جس میں ضلع سنچالک ڈاکٹر موہن لال شرمااور جموں کشمیر پرانت (ایگزیکٹیو ممبر، ورکنگ کمیٹی، آر ایس ایس، جے اینڈ کے) نے سامعین اور آر ایس ایس کے کیڈٹس کے سامنے ایک خطبہ (پرواچن) دیا۔انہوں نے کہا کہ آر ایس ایس ہمیشہ قومی کاز میں سب سے آگے رہی ہے۔ اس موقع پر شستر پوجن کی سالانہ رسم بھی منعقد کی گئی۔تقریب کا اختتام راون، میگناتھ اور کمبھ کرن کے پتوں کو جلا کر کیا گیا۔ضلعی اور پولیس انتظامیہ نے تہوار کے ہموا رانعقادکے لئے وسیع سیکورٹی اور دیگر ضروری انتظامات کئے تھے۔
