عوامی دربار کا مقصد سنگل وِنڈو پلیٹ فارم فراہم کرنا ہے: گوئیل
عظمیٰ نیوزسروس
جموں//ایڈیشنل چیف سیکرٹری داخلہ آر کے گوئیل نے لوگوں کو سہولیت فراہم کرنے اور ان کے طویل عرصے سے زیر اِلتوا ٔاِنتظامی مسائل کو حل کرنے کے لئے پی ڈبلیو ڈی گیسٹ ہاؤس گاندھی نگر میں ایک عوامی دربار کا اِنعقاد کیا۔اِس موقعہ پرایڈیشنل چیف سیکرٹری نے خطاب کرتے ہوئے کہا کہ عوامی دربار کا مقصد عوام کو اَپنی شکایات کے ازالے کے لیے سنگل ونڈو پلیٹ فارم فراہم کرنا اور مختلف محکموں کے کام کاج کے بارے میں اُن سے فیڈ بیک حاصل کرنا ہے۔آر کے گوئیل نے موجود مختلف محکموں کے سربراہان کو ہدایت دی کہ وہ وفود اور اَفراد کی جانب سے اُٹھائے گئے مسائل اور مطالبات کے فوری حل کو یقینی بنائیں اور مقررہ وقت اور نتیجہ خیز انداز میں کارروائی شروع کریں۔ایڈیشنل چیف سیکرٹری داخلہ نے ایک مطالبہ کے جواب میں جوائنٹ کمشنر جموں میونسپل کارپوریشن (جے ایم سی) سے کہا کہ وہ اس بات کو یقینی بنائیں کہ جے ایم سی کے ہر وارڈ اور ہر استفادہ کنندہ کو بغیر کسی تعصب کے پینے کے پانی اور صفائی ستھرائی کی سہولیات فراہم کی جائیں۔ اُنہوں نے اُنہیں ہدایت دی کہ وہ جے ایم سی کے وارڈ نمبر 65 کے معاملے کی ذاتی طور پر نگرانی کریں جسے وارڈ کے نمائندے نے دربار میں اُٹھایا تھا۔وفود نے رَسائی پروگرام پر اطمینان کا اِظہار کیا اوراُنہوںنے کہا کہ اس سے انہیں اَپنی شکایات اور حکومت کو مناسب ذرائع سے حل کرنے کا موقعہ ملا۔
عوامی مسائل ان کی دہلیز پر سن کر زمینی حقائق کا جائزہ لیا گیا:کابرا
عظمیٰ نیوزسروس
کٹھوعہ//ایڈیشنل چیف سیکرٹری جل شکتی محکمہ شالین کابرا نے کمیونٹی ہال ہیرا نگر میں ایک عوامی دربار کی صدارت کی اور انہوں نے وہاں عوامی اہمیت کے مسائل کو اُجاگر کرتے ہوئے شکایات سنیں ۔پی آر آئی کے ممبران اور مختلف وفود کی فعال شرکت نے اس پروگرام کو نمایاں کیا جہاں انہوں نے ایڈیشنل چیف سیکرٹری کو اپنے اپنے علاقوں میں اہم ترقیاتی ضروریات سے آگاہ کیا ۔شالین کابرا نے سرحدی دیہاتوں میں پانی کی قلت کے نمایاں مسئلے پر جواب دیتے ہوئے متعلقہ محکمے سے لفٹ اری گیشن سکیم کے دائرہ کار کو تلاش کرنے کو کہا تاکہ ہیرا نگر کے خشک علاقوں کی آبپاشی کی ضروریات کے لئے اِضافی پانی کو اِستعمال کیا جاسکے۔اُنہوں نے سرحدی علاقوں میں ٹرانسپورٹیشن کی سہولیات کو بڑھانے کے مطالبے کے بارے میںضلع ترقیاتی کمشنر کٹھوعہ کو ہدایت دی کہ وہ اس معاملے کو دیکھیں اور سرحدی باشندوں کی سہولیت کے لئے ممکنہ حل تلاش کریں۔عوامی دربار کے دوران بیوپار منڈل، بارڈر ویلفیئر کمیٹی، ممتاز شہریوں اور افراد کی دیگر نمائندگیوں کا بھی اندراج کیا گیا۔ایڈیشنل چیف سیکرٹری نے اجتماع سے خطاب کرتے ہوئے کہا کہ عوامی دربار کا انعقاد حکومت کی ایک سنجیدہ کوشش ہے کہ عوام کے مسائل ان کی دہلیز پر سن کر زمینی حقائق کا جائزہ لیا جائے۔ اُنہوں نے لوگوں کو یقین دِلایا کہ ان کے مطالبات کو متعلقہ محکموں کے نوٹس میں لایا جائے گا اور مناسب کارروائی اور ان کی شکایات کا بروقت ازالہ کرنے کی یقین دہانی کی۔شالین کابرا نے لائن ڈیپارٹمنٹوں سے بات چیت کرتے ہوئے وسائل کا زیادہ سے زیادہ اِستعمال کرتے ہوئے عوامی اہمیت کے مسائل کو حل کرنے کے لئے یکوقتی ازالہ اورعملی طریقہ کار اپنانے پر زور دیا۔ضلع ترقیاتی کمشنر کٹھوعہ نے اے سی ایس شالین کابرا کو یقین دلایا کہ تمام نمایاں مسائل کو متعلقہ حکام مقررہ مدت میں حل کریں گے۔بعد میں شالین کابرا نے بی او پی چک چھانگا کا دورہ کیا تاکہ ہیرا نگر سیکٹر کے بین الاقوامی ہند۔پاک سرحد پر حال ہی میں زیرو لائن کے پار بوئی گئی گندم کی فصل کو دیکھا جا سکے۔
حکومت لوگوںکی فلاح و بہبود کیلئے پُرعزم :پریرنا پوری
عظمیٰ نیوزسروس
رِیاسی//کمشنر سیکرٹری اِنفارمیشن ٹیکنالوجی اور محکمہ اطلاعات پریرنا پوری نے منی سیکرٹریٹ ڈسٹرکٹ ایڈمنسٹریٹیو کمپلیکس میں ایک عوامی دربار کی صدارت کی اور ضلع کے لوگوں کی شکایات اور مطالبات کا جائزہ لیا۔عوامی دربارمیںمعاشرے کے تمام طبقوں کی جانب سے زبردست ردِّعمل دیکھنے میں آیا۔ اِس کیمپ کا اِنعقاد حکومتی اعلیٰ اَفسران اور مقامی کمیونٹی کے درمیان براہ راست رابطے کو ممکن بنانے کے مقصد سے کیا گیا تھا۔کیمپ میں مختلف شعبہ ہائے زندگی سے تعلق رکھنے والے نمائندے اور رہائشی جمع ہوئے اور متعلقہ حکام کے ساتھ بات چیت کرنے کی بے تابی کا مظاہرہ کیا ۔لوگوں نے بنیادی ڈھانچے کی ضروریات سے لے کر سماجی بہبود کے مسائل تک اَپنی شکایات کو بیان کرنے کے لئے پلیٹ فارم کا استعمال کیا جس سے فعال مسائل کو حل کرنے کے لئے سازگار ماحول پیدا ہوا۔اِس تقریب میں ضلعی ترقیاتی کونسل ممبران ،بی ڈی سی چیئرپرسنوں،سرپنچوں اور ممتاز شہریوں، سیلف ہیلپ گروپوں، این جی اوز پر مشتمل وفود نے شرکت کی اور اَپنی شکایات پیش کیں اور مطالبات کی یادداشت بھی پیش کی۔تقریب میں مختلف سرکاری محکموں کے سربراہان نے شرکت کی اور کمیونٹی کے مسائل کو حل کرنے کے لئے اِجتماعی کوششوں کا مظاہرہ کیا۔دربار کے دوران عوام نے کمشنر سیکرٹری کے سامنے بہت سارے مسائل اٹھائے ۔کمشنر سیکرٹری نے کہا کہ پبلک پرائیویٹ پارٹنرشپ (پی پی پی) ماڈل کے تحت گینڈولہ کی تنصیب کی تجویز پر غورو خوض کیا جائے گا۔دربار سیشن کے دوران دور دراز علاقوں میں روڈ ٹرانسپورٹ کارپوریشن (آر ٹی سی) بس خدمات شروع کرنے کے لئے ایک اہم اقدام کا انکشاف کیا گیا اور ضلع کے دُور دراز علاقوں میں بس سروس پر عمل درآمد کو تیز کرنے کے لئے متعلقہ محکموں کے ساتھ معاملات اُٹھائے گئے ہیں۔ ریاسی، کٹراہ اور پنتھل علاقوں میں بندروں کی دراندازی سے پیدا ہونے والے مسلسل چیلنجوں کے جواب میںاس مسئلے کو کم کرنے کے لئے فعال اَقدامات اُٹھائے جا رہے ہیں۔کمشنر سیکرٹری نے عوامی شکایات بغور سنا اور یقین دِلایا کہ ان کے حقیقی مسائل کو مرحلہ وار طریقے سے دور کیا جائے گا۔ اُنہوں نے یقین دلایا کہ دربار کے دوران اٹھائے گئے تمام خدشات اور شکایات کو جلد از جلد حل کرنے کے لئے متعلقہ محکمے تک پہنچایا جائے گا۔پریرنا پوری نے ریاسی کے رہائشیوں کو درپیش مسائل کو حل کرنے کے لئے اَپنے عزم کا اِظہار کیا اور سرکاری اَفسروںپر زور دیا کہ وہ عوام کے سامنے جوابدہ اور قابل رسائی رہنے پر زور دیا۔
مسائل ومطالبات کومتعلقہ محکموں کی نوٹس میں لایا جائے گا:نندا
عظمیٰ نیوزسروس
سانبہ//کمشنر سیکرٹری سماجی بہبودشیتل نندا نے ایک عوامی دربار منعقد کرنے کے لئے ضلع سانبہ کا دورہ کیا۔کمشنرسیکرٹری نے سانبہ کے اپنے دورے کا آغاز بلاک سانبہ کی پنچایت دیانی میں منعقد’’ وِکست بھارت سنکلپ یاترا‘‘ پروگرام میں شرکت سے کیا۔ تقریب کے دوران اُنہوں نے سنکلپ یاترا کا حلف لیا اور محکمانہ سٹالوں کا معائینہ کیا۔ اُنہوں نے مستحقین میں زمین کی پاس بکس بھی تقسیم کئے اور ضلع میں کامیابی حاصل کرنے والی خواتین اور غیر معمولی کھلاڑیوں کو اسناد پیش کئے۔کمشنر سیکرٹری نے ’’میری کہانی، میری زبانی‘‘اقدام کے ایک حصے کے طور پر مختلف سرکاری فلیگ شپ پروگراموں کے استفادہ کنندگان سے بات چیت کی جنہوں نے اپنی کہانیوں کا اِشتراک کیا۔ اِس موقعہ پرسکولی بچوں کی جانب سے ایک ثقافتی پروگرام کا اِنعقاد کیا گیا۔شیتل نندا نے بچوں کی فلاح و بہبود کی اہمیت پر زور دیتے ہوئے مستحقین میں چائلڈ کیئر کٹس بھی تقسیم کیں۔ اُنہوں نے چائلڈ لیبر کوروکنے کے لئے ایک ٹیم کی تشکیل کی ہدایت دی اورڈسٹرکٹ سوشل ویلفیئر آفیسر سانبہ کو ہدایت دی کہ وہ ضلع میں چائلڈ لیبر سے نمٹنے کے لئے کسی بھی معاملے کی کڑی نگرانی کریں۔مزید برآں ،کمشنرسیکرٹری نے چک جھنگیاں میں آنگن واڑی سینٹر کا دورہ کیا ۔پانی سمیتی کی کوششوں کو تسلیم کرتے ہوئے 12 دیہات اور 8 پنچایتوں کے ممبران کو ان کے گائوں ہر گھر جل کو سرٹیفائیڈ بنانے میں ان کے تعاون پر ابھی نندن پطرس سے نوازا گیا۔بعد ازاں ،عوامی دربار منعقد ہوا جہاں کمشنر سیکرٹری نے کارروائی کی صدارت کی ۔ اِس موقعہ پر ڈسٹرکٹ ڈیولپمنٹ کونسل کے ممبران، پی آر آئی ممبران اور مختلف وفود نے بھی شرکت کی۔عوامی دربار کے دوران کئی مسائل اٹھائے گئے۔کمشنر سیکرٹری نے تمام اَفراد اور وفود کو یقین دِلایا کہ ان کے مسائل اور جائز مطالبات کو فوری حل کے لئے متعلقہ محکموں کی توجہ میں لایا جائے گا۔
مقصدکوئی شخص فلاحی اور ترقیاتی سکیموں کے فوائد سے محروم نہ رہے:یشا مدگل
عظمیٰ نیوزسروس
رام بن//کمشنر سکریٹری کوآپریٹیو، یشا مدگل نے رام بن میں ایک میگا عوامی دربار کی صدارت کی تاکہ عوام کے مسائل اور مطالبات سننے کے علاوہ ضلع میں ترقیاتی کاموں اور استفادہ کنندگان پر مبنی اسکیموں کی حالت کا جائزہ لیا جاسکے۔اس موقع پر اظہار خیال کرتے ہوئے کمشنر سکریٹری نے عوامی دربار کی اہمیت کو بیان کرتے ہوئے کہا کہ اس گورنمنٹ-عوام انٹرفیس پروگرام کو شروع کرنے کا بنیادی مقصد یہ یقینی بنانا ہے کہ ایک بھی شخص فلاحی اور ترقیاتی سکیموں کے فوائد سے محروم نہ رہے۔ انہوں نے لوگوں پر زور دیا کہ وہ ضلع کے ترقیاتی پروفائل کو سرفہرست مقام پر لے جانے کے لیے ضلعی انتظامیہ کے ساتھ اپنی فعال شمولیت کو یقینی بنائیں۔ضلع کی شرح خواندگی کو بہتر بنانے پر زور دیتے ہوئے کمشنر سکریٹری نے اسکول اور کالجوں کے ڈراپ آؤٹ کی شرح کو کنٹرول کرنے کے ساتھ ساتھ معاشرے کی مجموعی ترقی کے لیے خواتین کی تعلیم کو ترجیح دینے کو کہا۔ ترقی پذیر معاشرے کی تشکیل میں نشا مکت نوجوانوں کے کردار پر روشنی ڈالتے ہوئے کمشنر سکریٹری نے ضلع انتظامیہ اور لوگوں سے کہا کہ وہ نوجوانوں کو منشیات کی لت سے بچانے کے لیے مشن موڈ پر مشترکہ طور پر نشا مکت مہم کو تیز کریں۔کمشنر سیکرٹری نے کہا کہ عوامی دربار ایک باقاعدہ خصوصیت ہو گا اور اگلے عوامی دربار کی صدارت کرنے سے پہلے وہ مختلف عوامی نمائندوں اور عوام کی طرف سے اجاگر کئے گئے مسائل پر محکموں کی طرف سے کئے گئے اقدامات کا جائزہ لیں گی تاکہ تمام حقیقی مسائل کے ازالے کو یقینی بنایا جا سکے۔کمشنر سکریٹری نے کہا کہ تمام مسائل کا جائزہ لیا جائے گا اور اس کے ازالے کے لیے ضلعی سطح، سیکریٹریٹ کی سطح اور مرکزی سطح کے ساتھ ساتھ ترجیحی بنیادوں پر مقررہ وقت میں کارروائی کی جائے گی۔
