عظمیٰ مانیٹرنگ ڈیسک
ٹوکیو// جاپان میں طاقتور سمندری طوفان شان شان سے مرنے والوں کی تعداد چھ ہو گئی ہے جب کہ زخمیوں کی تعداد 125 تک پہنچ گئی ہے اور ایک شخص کے لاپتہ ہونے کی اطلاع ہے ۔ ملک کے صوبہ آیچی میں لینڈ سلائیڈنگ کے دوران لاپتہ ہونے والے پانچ افراد میں سے تین کی ہلاکت کی تصدیق ہو گئی ہے ، جب کہ دو افراد زخمی ہیں۔ شیکوکو جزیرے کے کامیتا شہر میں ایک اور شخص کی موت ہو گئی۔کیوشو جزیرے پر تقریباً 31,000 گھر بجلی سے محروم ہیں۔ طوفان کی وجہ سے ہفتے کے روز ٹوکیو اور ناگویا کے درمیان شنکانسن ٹرین خدمات مکمل طور پر روک دی گئیں اور کئی شاہراہیں بھی بند کر دی گئیں۔ادھرسوڈانی وزارت صحت کا کہنا ہے کہ 11 ریاستوں میں جون سے اب تک ہونے والی شدید بارشوں کے باعث آنے والے سیلاب سے ہلاکتوں کی تعداد 173سے زائد ہوگئی ہے ۔ ملک میں شدید بارشوں اور اس کے نتیجے میں آنے والے سیلاب سے ہزاروں افراد متاثر ہوئے ہیں۔رپورٹ کے مطابق سوڈان میں آنے والے بدترین سیلاب سے ہلاک ہونے والوں کی تعداد 173 اور زخمیوں کی تعداد 505 تک پہنچ گئی، 18 ہزار 665 مکانات مکمل اور 14 ہزار 947 مکانات مکمل طور پر تباہ ہوگئے ۔سوڈان میں جولائی اور اکتوبر کے درمیان بارشوں کے دوران سیلاب اور بہاؤ کے نتیجے میں ہر سال 100 سے زائد افراد ہلاک ہوتے ہیں اور ہزاروں مکانات، مقامات کار اور زرعی زمینوں کو نقصان پہنچا ہے ۔دوسری جانب بھارتی ریاست گجرات میں طوفانی بارشوں کے باعث دریاؤں میں پانی کی سطح میں خطرناک حد تک اضافہ ہوگیا ہے ، جس کے سبب دو روز کے دوران 16 سے زائد افراد لقمہ اجل بن گئے ہیں۔رپورٹ کے مطابق گجرات میں غیر معمولی بارشوں کے باعث دریاؤں کی سطح میں بھی خطرناک اضافہ ریکارڈ کیا گیا ہے ، جس کے باعث ریڈ الرٹ جاری کردیا گیا ہے جبکہ فوج کو بھی طلب کرلیا گیا ہے ۔اس کے علاووہ ریاستی علاقے بڑودہ، جام نگر اور موربی کے رہائشی علاقوں میں ہر طرف پانی بھر چکا ہے ، متاثرہ علاقوں میں گھر اور گاڑیاں کئی فٹ پانی میں ڈوب چکے ہیں۔
