محمد تسکین
بانہال// جموں سرینگر قومی شاہراہ پچھلے کئی روز کی طرح جمعرات کے روز بھی یکطرفہ ٹریفک کیلئے بحال رہی تاہم ناشری اور بانہال ٹنل کے درمیان شاہراہ کے کئی مقامات پر سڑک کی خراب حالات اور سڑک پر یکطرفہ ٹریفک کی ہی آمدورفت کی وجہ سے ٹریفک جام کا سلسلہ بھی وقفے وقفے سے جاری رہا۔ جمعرات کی صبح جموں سے مسافر بردار گاڑیوں کو جموں اور ادھم پور سے وادی کشمیر کی طرف آنے کی اجازت دی گئی ۔دوپہر بعد قریب دو بجے جکینی ادھم پور سے مال بردار ٹرکوں اور پتنی ٹاپ میں روکے گئے پیٹرول ، ڈیزل اور گیس سے بھرے ٹینکروں کو وادی کشمیر کی طرف چلنے کی اجازت دی گئی۔ ٹریفک کنٹرول یونٹ رام بن نے کشمیر عظمی کو بتایا کہ شاہراہ پر ٹریفک کی نقل و حمل بنا کسی خلل کے جاری رہی اور سینکڑوں کی تعداد میں پہلے مسافر اور بعد میں ماک بردار ٹریفک نے سفر کیا۔ انہوں نے کہا تاہم ڈھلواس ، شیر بی بی اور رام بن کے سیکٹر میں ٹریفک کی نقل وحرکت سست روی کا شکار رہی اور گاڑیوں کو ایک ایک کرکے نکالا گیا۔
انہوں نے کہا کہ اس دوران ناشری کی پسی میں دھنستی اور یکطرفہ سڑک پر گر ائے ملبے اور کیچڑوں کو سڑک سے صاف کرنے کیلئے دونوں طرف کے ٹریفک کو روک کر کچھ وقت تک وقفہ لیا گیا اور سڑک کو کشادہ اور بہتر بنا کر ٹریفک کو دوبارہ بحال کیا گیا۔ واضح رہے کہ پچھلے کئی روز سے متعدد مقامات پر شاہراہ کی خراب حالت کے پیش نظر حکام نے متفقہ طور پر جموں سرینگر قومی شاہراہ شاہراہ پر یکطرفہ ٹریفک کو ہی چلانے کا فیصلہ لیا ہے اور مجموعی طور پر یکطرفہ ٹریفک کی بحالی کے بعد شاہراہ پر رام بن اور بانہال کے سیکٹر میں ہزاروں مسافروں کو ٹریفک جام سے کسی حد تک راحت ملی ہے۔ عام لوگوں اور مسافروں کا مطالبہ ہے کہ شاہراہ پر سڑک کو مکمل طور پر ٹھیک کرنے تک شاہراہ پر یکطرفہ ٹریفک ہی چلایا جائے تاکہ روز روز کے ٹریفک جام سے شاہراہ کے ہزاروں مسافروں اور سیاحوں کے علاوہ ضلع رام بن کے مسافروں اور عام لوگوں کو ٹریفک جام سے پیدا ہونے والی دشواریوں اور پریشانیوں سے خلاصی مل سکے۔اس دوران محکمہ موسمیات نے جمعہ سے آئندہ چند روز تک ریاست کے طول و عرض میں بارشوں اور برفباری کی پیشگوئی کی ہے اور رام بن بانہال میں دوپہر بعد سے گہرے بادل چھائے ہوئے ہیں۔
