یواین آئی
تل ابیب// اسرائیلی وزیر دفاع اسرائیل کاٹز نے یمن میں حوثی کے رہنما عبدالملک الحوثی کو براہِ راست دھمکی دیتے ہوئے کہا ہے کہ ’’تمھاری باری بھی آئے گی۔‘‘ترک نیوز ایجنسی انادولو کے مطابق اسرائیلی وزیر دفاع اسرائیل کاٹز نے یمن کے حوثی گروپ کے سربراہ عبدالملک الحوثی کو قتل کرنے اور یمن کے دارالحکومت صنعا پر اسرائیل کا جھنڈا لہرانے کی دھمکی دی ہے۔انھوں نے سوشل میڈیا پلیٹ فارم ایکس پر اپنے پیغام میں لکھا کہ عبدالملک الحوثی کو اپنی حکومت کے دیگر ارکان سے ملاقات کے لیے دوسری دنیا بھیجا جائے گا اور صنعا میں حوثیوں کے جھنڈے پر لکھے نعرے ’الموت اسرائیل‘ کی جگہ اسرائیل کا پرچم لہرایا جائے گا۔اسرائیل اور یمن کے حوثیوں کے درمیان کشیدگی ایک نئے موڑ پر پہنچ گئی ہے۔ اس سے ایک روز قبل اسرائیلی فوج نے اعلان کیا تھا کہ یمن سے داغا گیا ایک میزائل فضا میں ہی تباہ کر دیا گیا، جب کہ ایک ڈرون نے جنوبی اسرائیل کے شہر ایلات کو نشانہ بنایا۔اسرائیلی فوج کے مطابق یمن سے داغے گئے میزائل کو روکنے کے بعد کئی علاقوں میں سائرن بج اٹھے۔ حوثیوں نے ان حملوں کی ذمہ داری قبول کی اور دعویٰ کیا کہ انھوں نے اسرائیل کی جانب تین کارروائیاں کیں، جن میں میزائل اور ڈرون حملے شامل ہیں۔
