نیوز ڈیسک
جموں// جموں و کشمیر انتظامیہ کاروباری سرمایہ کاری کو فروغ دینے اور مقامی آبادی کی آمدنی بڑھانے کے لیے قواعد و ضوابط اور طریقہ کار کو آسان بنا کر اور ریکارڈ کو ڈیجیٹائز کرنے کے لیے کام کر رہی ہے۔حکام نے کہا ہے کہ2019 میں سابقہ ریاست جموں و کشمیر سے آرٹیکل 370 کی منسوخی کے بعد سے مرکز کے زیر انتظام علاقے کو مختلف کاروباری کمپنیوں سے تقریباً 56,000 کروڑ روپے کی سرمایہ کاری کی تجاویز موصول ہوئی ہیں جبکہ 38,000 کروڑ روپے کی تجاویز کو منظوری دی گئی ہے۔ انتظامیہ کے ایک اعلیٰ عہدیدار نے بتایا کہ تقریباً 12,000 کروڑ روپے کے پروجیکٹوں پر کام پہلے سے ہی جاری ہے۔انہوں نے کہا کہ لیفٹیننٹ گورنر منوج سنہا نے عہدیداروں اور حکام کو ہدایت کی ہے کہ وہ اس بات کو یقینی بنائیں کہ لوگوں سے جڑی تمام سرگرمیوں کو “متحرک اور قابل عمل” بنایا جائے۔محکمہ محصولات کے ایک سینئر افسر نے بتایا کہ حکومت زمین کے ریکارڈ کا 22 ہندوستانی زبانوں میں ترجمہ کر رہی ہے تاکہ سرمایہ کار آسانی سے ان کا استعمال کر سکیں اور یہاں تک کہ مقامی لوگ بھی ان کا استعمال کر سکیں۔انہوں نے مزید کہا کہ اس مقصد کے لیے C-DAC کا تیار کردہ سافٹ ویئر استعمال کیا جا رہا ہے۔عہدیداروں نے کہا کہ یونین ٹیریٹری (UT) نے پچھلے تین سالوں میں بنیادی طور پر مینوفیکچرنگ اور فوڈ پروسیسنگ کے شعبوں میں سرمایہ کاری کو راغب کیا ہے اور اس وقت آٹوموبائل اور اس سے منسلک شعبوں میں کچھ پروجیکٹوں پر تبادلہ خیال کیا جارہا ہے۔ایک سینئر افسر نے کہا’’مقصد ریاست کی مجموعی معیشت کو فروغ دینا ہے۔ اس کے ساتھ ساتھ ہم سیاحت کے شعبے اور ترقی کے شعبے پر بڑے پیمانے پر کام کر رہے ہیں تاکہ مقامی لوگوں کی آمدنی میں اضافہ ہو سکے۔ حکومت نے حال ہی میں وادی کشمیر بشمول دور دراز علاقوں میں ہوم اسٹے کھولنے سے متعلق رہنما خطوط میں نرمی اور ہموار کیا ہے‘‘ ۔انہوں نے کہا کہ جن لوگوں کے پاس سیاحوں کے لیے بنیادی رہائش کی سہولیات کے ساتھ چار یا اس سے کم کمرے ہیں وہ محکمہ سیاحت کے پورٹل پر درخواست دے کر لائسنس حاصل کر سکتے ہیں۔ افسر نے کہا کہ ہم میزبانوں کے لیے مہمان نوازی سے متعلق تربیت کا انعقاد کر رہے ہیں۔افسر نے کہا کہ ایڈونچر اسپورٹس کے لیے کچھ نئے مقامات تیار کیے جا رہے ہیں اور گلمرگ اور دیگر مقامات پر موجود انفراسٹرکچر کو بہتر بنایا جا رہا ہے۔ان تمام اقدامات کا مقصد اس بات کو یقینی بنانا ہے کہ مقامی نوجوان دہشت گردی کی طرف نہ بڑھیں اور ساتھ ہی کشمیریوں کو وہ فوائد ملیں جس کے وہ حقدار ہیں۔ ایک اور افسر نے کہا کہ صرف سیکورٹی منظر نامے کے ذریعے کشمیر کی تعریف ختم ہونی چاہیے۔
