عظمیٰ نیوز سروس
جموں//مرکزی وزیر داخلہ امیت شاہ نے جمعہ کو جموں اور کشمیر اسمبلی انتخابات کے لئے بی جے پی کا منشور جاری کیا، اور زور دے کر کہا کہ دفعہ 370 “تاریخ” بن گیا ہے اور کبھی بھی مرکز کے زیر انتظام علاقے میں واپسی نہیں کرے گا۔
دفعہ 370
یہاں ایک پریس کانفرنس سے خطاب کرتے ہوئے شاہ نے کہا کہ گزشتہ 10 سالہ دور کو ملک اور جموں و کشمیر کی تاریخ میں سنہری حروف سے لکھا جائے گا، اور لوگوں پر زور دیا کہ وہ اچھی حکمرانی کو جاری رکھنے کے لیے ان کی پارٹی کو ووٹ دیں۔شاہ 18 ستمبر، 25 اور یکم اکتوبر کو تین مرحلوں میں منعقد ہونے والے اسمبلی انتخابات کے لیے بی جے پی کی مہم کا آغاز کرنے کے لیے دو روزہ دورے پر دن کے اوائل میں جموں پہنچے۔مرکزی وزیر داخلہ نے منشور جاری کرنے سے پہلے اپنی تقریر میں کہا”میں نیشنل کانفرنس کے ایجنڈے سے واقف ہو چکا ہوں، میں پورے ملک پر یہ واضح کرنا چاہتا ہوں کہ آرٹیکل 370 تاریخ بن چکا ہے اور کبھی واپس نہیں آئے گا، “۔انہوں نے کہا کہ آرٹیکل 370 اب آئین کا حصہ نہیں ہے۔ شاہ نے مزید کہا، “اس آرٹیکل نے نوجوانوں کے ہاتھوں میں صرف ہتھیار اور پتھر دیئے اور انہیں دہشت گردی کے راستے پر چلنے میں سہولت فراہم کی ہے۔”
وائٹ پیپر
شاہ نے مزید کہا کہ جموں و کشمیر سے دہشت گردی کا مکمل خاتمہ کیا جائے گا۔ جموں و کشمیر کے لوگوں سے اسمبلی انتخابات میں بی جے پی کو ووٹ دینے کی اپیل کرتے ہوئے، شاہ نے کہا، “ہمیں خطے کی ترقی کو یقینی بنانے کے لیے پانچ سال کا دور دیں۔” انہوں نے مزید کہا کہ “جموں و کشمیر میں دہشت گردی کے ابھرنے میں ملوث افراد کی ذمہ داری طے کرنے کے لیے ایک وائٹ پیپر جاری کیا جائے گا۔” انہوں نے کہا “ہم گزشتہ تین دہائیوں میں جموں و کشمیر میں ہونے والی 40,000 ہلاکتوں پر ایک وائٹ پیپر جاری کریں گے اور ذمہ داری کا تعین بھی کریں گے۔”انہوں نے کہا کہ بی جے پی ہمیشہ سے جموں و کشمیر کا یونین آف انڈیا کے ساتھ انضمام چاہتی ہے۔ “2014 تک، جموں و کشمیر علیحدگی پسندی اور دہشت گردی سے دوچار تھا۔ شاہ نے کہا کہ ہم نے جموں و کشمیر میں حریت کی حمایت یافتہ حکومتیں بھی دیکھی ہیں،۔ 2014 کے بعد، وزیر اعظم نریندر مودی کی قیادت میں امن اور خوشحالی کا ایک نیا باب شروع ہوا۔”
راہل گاندھی
راہل گاندھی پر طنز کرتے ہوئے شاہ نے کہا کہ راہل کو یہ بتانا ہوگا کہ آیا وہ اور ان کی پارٹی این سی کے منشور کی حمایت کرتی ہے جس میں دفعہ 370 کی بحالی، پتھرا ئوکرنے والوں اور علیحدگی پسندی کو فروغ دینے میں ملوث قیدیوں کی رہائی کا وعدہ کیا گیا ہے۔انہوں نے کہا، میں عمر عبداللہ سے کہنا چاہتا ہوں کہ نتائج کچھ بھی ہوں، ہم آپ کو گجروں، بکروالوں اور پہاڑیوں کو دی گئی ریزرویشن کو ہاتھ لگانے کی اجازت نہیں دیں گے۔”میں راہل سے پوچھنا چاہتا ہوں کہ کیا وہ اور ان کی پارٹی جموں و کشمیر میں دہشت گردی، علیحدگی پسندی کا احیا چاہتی ہے؟ کیا راہل دو جھنڈوں اور دفعہ 370کی بحالی کی حمایت کرتے ہیں؟ وہ جواب نہیں دیں گے۔ لیکن میں یہاں یہ بتانا چاہتا ہوں کہ راہل این سی کے منشور کی حمایت میں ہیں۔
ریاستی بحالی
جموں و کشمیر کو ریاستی حیثیت کی بحالی کے بارے میں ایک سوال کا جواب دیتے ہوئے، انہوں نے کہا: “میں نے بطور وزیر داخلہ ایوان کے فلور پر وعدہ کیا ہے کہ اسمبلی انتخابات کے بعد مناسب وقت پر جموں و کشمیر کو ریاست کا درجہ دیا جائے گا۔ ایسی چیز کا مطالبہ کیوں کیا جائے جو پہلے ہی قبول ہو چکی ہو؟
پاکستان
پاکستان کے ساتھ بات چیت کے امکان پر شاہ نے کہا کہ مذاکرات اور دہشت گردی ایک ساتھ نہیں چل سکتے۔ انہوں نے کہا کہ جب تک پاکستان دہشت گردی بند نہیں کرتا ہم پاکستان سے نہیں کشمیر کے نوجوانوں سے بات کریں گے۔ اس سوال کے جواب میں کہ کیا پاکستان کے ساتھ تجارت شروع کی جا سکتی ہے، انہوں نے کہا کہ تجارت دہشت گردی کی بنیاد رکھتی ہے۔ اس لیے جب تک دہشت گردی نہیں ہوتی پاکستان کے ساتھ تجارت کا سوال ہی پیدا نہیں ہوتا۔
اتحاد
اتحاد کے بارے میں، انہوں نے کہا کہ تین خاندانوںمفتیوں، عبداللہوں اور گاندھیوں کے علاوہ، بی جے پی آپشن کھلے رکھے گی۔ انہوں نے کہا کہ ایک بات یقینی ہے کہ جموں و کشمیر میں این سی، پی ڈی پی، کانگریس کی حکومت نہیں ہوگی۔
سیاحتی ہاٹ سپاٹ
امت شاہ کا کہنا ہے کہ جموں و کشمیر دہشت گردوں کے ہاٹ سپاٹ سے سیاحتی ہاٹ سپاٹ میں تبدیل ہوگیا ہے۔ شاہ نے کہا کہ مودی حکومت کے تحت جموں و کشمیر امن اور ترقی کے ایک نئے دور کا مشاہدہ کر رہا ہے۔ تعلیمی اور معاشی سرگرمیوں میں اضافے کے ساتھ یہ خطہ دہشت گردی کے گڑھ سے ایک سیاحتی مقام میں تبدیل ہو گیا ہے۔
