عظمیٰ نیوز ڈیسک
پٹنہ//بہار کے گوپال گنج ضلع میں ایک بڑا حادثہ ہوا ہے۔ یہاں گنڈک ندی میں نہانے کے دوران ڈوب جانے سے ایک ہی کنبہ کے 4 نوجوانوں کی موت ہو جانے کی اطلاع ہے۔ یہ واقعہ بیکنٹھ کے مُنجا گاوں میں پیش آیا۔ نوجوان ایک ‘شرادھ کرم کے لیے گاوں آئے ہوئے تھے۔ ندی میں تیز بہاو کی وجہ سے یہ حادثہ ہونے کی بات کہی جا رہی ہے۔ ایس ڈی آر ایف کی ٹیم موقع پر پہنچ کر راحت اور بچاو کے کام میں لگ گئی ہے۔ لاپتہ ہوئے نوجوان میں دو سگے بھائی ہیں۔ یہ لوگ یادوپور کے مٹیاری گاوں کے رہنے والے ہیں۔اس حادثہ کے سلسلے میں بتایا جاتا ہے کہ ٹیچر نولیش کمار سنگھ کی والدہ کا حال ہی میں انتقال ہو گیا تھا، ان کے دشگاتر کے موقع پر کنبہ کے سبھی نوجوان منڈن کرانے کے لیے گنڈک ندی کے گھاٹ پر گئے تھے۔ منڈن کے بعد سجیت کمار(18) ندی میں نہانے گئے جہاں اچانک ان کا پیر پھسل گیا اور وہ ڈوبنے لگے۔ سجیت کو بچانے کے لیے سمیت کمار (14) اور نکھل کمار (19) اور سنجیو کمار بھی ندی میں کود پڑے۔ ندی میں تیز بہاو? ہونے کی وجہ سے نوجوان گہرائی میں پوری طرح سما گئے۔مقامی لوگوں نے حادثہ کے بعد انہیں تلاش کرنے کی بھرپور کوشش کی لیکن انہیں کامیابی نہیں ملی۔
