اشتیاق ملک
ڈوڈہ //مسلسل دس روز تک موبائل انٹرنیٹ سروسز و تعلیمی ادارے بند رہنے کے بعد انتظامیہ نے پیر کے روز براڈ بینڈ کے بعد باقاعدہ طور پر موبائل انٹرنیٹ سروسز کو بھی بحال کیا اور بارہویں روز اسکولوں میں بھی بہار لوٹ آئی جبکہ بازاروں میں معمول کے مطابق کاروباری سرگرمیاں جاری رہیں۔ تفصیلات کے مطابق رواں ماہ کی 9 تاریخ کو گستاخ رسولؐ کے خلاف ہوئے احتجاج کے دوران پیدا فرقہ وارانہ کشیدگی کے بعد انتظامیہ نے ضلع بھر میں براڈ بینڈ و موبائل انٹرنیٹ سروسز کو معطل کر کے کرفیو نافذ کیا تھا تاہم ڈوڈہ، ٹھاٹھری و گندوہ میں پہلے ہی بندشیں ہٹائی گئیں ہیں اور پیر کو باقاعدہ طور پر ایڈیشنل ضلع بھدرواہ میں تعلیمی ادارے کھولے گئے اور موبائل انٹرنیٹ بھی بحال کیا گیا۔ اس دوران انتظامیہ نے دن کو مکمل ڈھیل دی اور احتیاطی طور پر شبانہ کرفیو جاری رکھنے کا فیصلہ کیا۔اے ڈی سی بھدرواہ چوہدری دلمیر نے کشمیر عظمیٰ کو بتایا کہ دس روز بعد موبائل انٹرنیٹ سروسز کو بحال کیا گیا اور تعلیمی اداروں کے ساتھ ساتھ تجارتی و سرکاری سرگرمیاں بھی مکمل طور پر دوبارہ شروع ہو گئیں۔ انہوں نے لوگوں سے اپیل کی کہ وہ سوشل میڈیا پر ناقابل اعتراض مواد شئر کرنے سے احتیاط کریں اور ایسے افراد کی نشاندہی کر کے انتظامیہ کو مطلع کریں جو نقص امن میں خلل ڈالنے کی کوشش کرتا ہے۔
