عظمیٰ نیوزسروس
ڈوڈہ//لڑکوں کے لیے انٹر ڈسٹرکٹ یو ٹی لیول ریسلنگ ٹورنامنٹ (اے اے جی) کمیونٹی ہال، بھدرواہ میں اختتام پذیر ہوا۔ اس تقریب کا انعقاد محکمہ یوتھ سروسز اینڈ اسپورٹس ڈوڈہ کے ذریعہ، راجندر سنگھ تارا، ڈائریکٹر جنرل یوتھ سروسز اینڈ اسپورٹس کی سرپرستی اور جوائنٹ ڈائریکٹر جموں وید پرکاش کی رہنمائی میں کیا گیا۔ ڈسٹرکٹ یوتھ سروسز اینڈ اسپورٹس آفیسر ڈوڈہ سنیل کمار نے اس تقریب کی نگرانی کی، جس میں جموں و کشمیر کے آٹھ اضلاع بشمول جموں، ادھم پور، سانبہ، ریاسی، کشتواڑ، راجوری، کٹھوعہ اور میزبان ضلع ڈوڈہ کے 164 پہلوانوں کی پرجوش شرکت دیکھنے میں آئی۔اس موقع پر اظہار خیال کرتے ہوئے ڈی وائی ایس ایس او ڈوڈہ نے کھلاڑیوں کی ان کی قابل ذکر صلاحیتوں، لگن اور کھیل کود کی تعریف کی۔ ٹورنامنٹ میں زبردست پرفارمنس دیکھنے میں آئی، جس میں ضلع جموں غالب ٹیم کے طور پر ابھرا، جس نے 17گولڈ، 5سلور اور 2کانسی کے تمغے حاصل کیے۔ ڈوڈہ کے پہلوانوں نے 3طلائی، 2چاندی اور 3 کانسی کے تمغوں کے ساتھ شاندار کامیابی حاصل کی۔ کشتواڑ نے 1چاندی اور 3کانسی کے تمغے حاصل کئے جبکہ ادھم پور نے 2سونے اور 2کانسی کے تمغے حاصل کیے۔ ریاسی نے 5چاندی اور 1کانسی، راجوری نے 2طلائی اور 7کانسی، سانبہ نے 6چاندی اور 4کانسی اور کٹھوعہ نے 6چاندی اور 9کانسی کے تمغے جیتے۔
