عظمیٰ نیوز سروس
جموں //بھاجپا کی جموں وکشمیر اکائی کی جانب سے ادھم پور ڈوڈہ پارلیمنٹ مینجمنٹ کمیٹی و پارلیمانی حلقوں کے کور گروپس کی میٹنگیں منعقد کی گئی۔پارٹی کے جموں وکشمیر کے ریاستی صدر رویندر رینہ کی قیادت میں منعقدہ اجلاس میں پارٹی کے سنیئر لیڈران نے شرکت کی ۔رویندر رینہ نے میٹنگ سے خطاب کرتے ہوئے ادھم پور ڈوڈہ پارلیمانی حلقہ انتخابی انتظامی کمیٹی کے کردار کی ستائش کی ۔انہوں نے کہا کہ بی جے پی کے کارکن انتخابات کے دوران علاقے کے انتہائی ناگفتہ بہ علاقوں میں پہنچ گئے تھے تاکہ ووٹ حاصل کرنے اور پارٹی کے ایم پی امیدوار کی حمایت کے لئے وزیر اعظم نریندر مودی کے ہاتھ مضبوط کر سکیں۔رینہ نے کہا کہ بی جے پی کارکن ہونے کا مطلب ہے قوم اور سماج کی ذمہ داری کو نبھانا اور انہوں نے ان پارلیمانی انتخابات میں اپنی لگن کا ثبوت دیا ہے۔ انہوں نے مزید کہا کہ انتخابات سے پہلے اور الیکشن کے دوران پارلیمانی حلقہ میں موجودہ ایم پی کے ذریعہ کئے گئے ترقیاتی کاموں کے ساتھ ساتھ ان کی گراؤنڈ ورک کے نتیجے میں پارلیمانی انتخابات 2024 میں بی جے پی کے حق میں بڑے پیمانے پر ووٹنگ ہوئی ہے۔اشوک کول نے میٹنگ میں الیکشن مینجمنٹ کمیٹی کے ساتھ ادھم پور-ڈوڈہ پارلیمانی حلقہ میں پارلیمانی انتخابات 2024 کے دوران کام کے بارے میں تبادلہ خیال کیا۔ انہوں نے انتظامی کمیٹی کے اراکین کو اپنے تجربات سے آگاہ کرنے کے لئے آمادہ کیا اور مختلف مخصوص شعبوں کی نشاندہی کی جن میں جموں و کشمیر کے آئندہ انتخابات کے دوران پارٹی کو مزید حمایت حاصل کرنے کے لئے پارٹی کیڈر کو مزید کوششوں کی ضرورت ہوگی۔رویندر رینہ صدر، جموں و کشمیر بی جے پی، اور اشوک کول، جنرل سکریٹری (تنظیم)، ڈاکٹر نریندر سنگھ، نیشنل سکریٹری، بی جے پی، ڈاکٹر جتیندر سنگھ، یونین ایم او ایس، جوگل کشور شرما، ایم پی، سنیل شرما کے ساتھ جنرل سکریٹری نے جموں ریاسی اور ادھم پور ڈوڈہ پارلیمانی حلقوں کے کور گروپس کے مشترکہ اجلاس سے خطاب کیا۔میٹنگ کے دوران، پارٹی کے سینئر عہدیداروں نے انتخابی انتظام، مہم اور ووٹنگ کے عمل کے دوران مختلف عوامل پر تفصیلی تبادلہ خیال کیا۔
