بھاجپا ضلع صدر بانڈی پورہ اور سرپنچ سے رشوت کی رقم وصول، کیس درج

عازم جان
بانڈی پورہ//جموں و کشمیر پولیس نے بھارتیہ جنتا پارٹی (بی جے پی) کے ضلع صدر بانڈی پورہ اور اس کے سرپنچ ساتھی کے خلاف ایک خاتون سے اس کے قیدی بھائی کو رہا کرانے کے بدلے ایک لاکھ روپے وصول کرنے کے الزام میں مقدمہ درج کیا ، پولیس نے رقم بھی ضبط کر لی ہے۔پولیس ان کا کہنا تھا کہ بانڈی پورہ کے بی جے پی ضلع صدر عبدالرحمن ٹکری نے اپنے “ساتھی” ، سرپنچ جس کی شناخت مشتاق احمد کے طور پرہوئی ہے، نے ایک خاتون سے اسکے بھائی عاقب خورشید کی جیل سے رہائی کے عوض ایک لاکھ روپے کا مطالبہ کیا اور رقم وصول بھی کی۔پولیس نے  بتایا کہ ملزم کے خلاف دفعہ 420آئی پی سی (دھوکہ دہی) کے تحت مقدمہ (ایف آئی آر نمبر 64) درج کیا گیا ہے اور تحقیقات جاری ہیں۔انہوں نے کہا کہ ملزمان سے رقم بھی ضبط کر لی گئی تھی اور دونوں کو بعد میں مکمل پوچھ گچھ کے بعد رہا کر دیا گیا ، کیونکہ انہوں نے پیشگی ضمانت کرائی تھی۔