ارشاد احمد
بڈگام//بڈگام میں پولیس نے ملی ٹینٹوں کے4 اعانت کاروں کی گرفتاری عمل میں لاتے ہوئے ان کے قبضے سے قابل اعتراض مواد اور چار گاڑیاں برآمد کیں۔بڈگام پولیس کے مطابق جمعہ کے روز 53 آر آر اور 181 بٹالین سی آر پی ایف کے اشتراک سے مصدقہ اطلاع کے بعد لشکر سے وابستہ چار اعانت کاروں کو حراست میں لیا گیا۔ان کی شناخت یونس منظور وازہ ولد منظور احمد، محبوب احمد شیخ ولد محمد رمضان ساکنان واتھورہ چاڈورہ ، ارشاد احمد گنائی ولد محمد امین ساکن آری گام خانصاحب اور مظفر احمد بٹ ولد غلام نبی ساکن پارنیوا خانصاحب بڈگام کے طور پر ہوئی ہے۔پولیس نے بتایا کہ ابتدائی تحقیقات سے معلوم ہوا کہ گرفتار شدہ اعانت کار لشکر کے سرگرم ملی ٹینٹوں میں منشیات منقسم کرکے ان کو منطقی مدد فراہم کرتے تھے ۔تحقیقات کے دوران یہ بات بھی سامنے آئی کہ مذکورہ گروہ سرگرم ملی ٹینٹوں کی ہدایت پر منشیات کی وصولی اور بعد ازاں منشیات سے حاصل ہونے والی آمدنی کو ملی ٹینٹوں میں تقسیم کرنے کے کام پر بھی مامور کئے گئے تھے۔گرفتار افراد کے قبضے سے ایک وگنار ، دو آلٹو ، ایک ٹاٹا موبائل کے ساتھ ایک موٹر سائیکل بھی برآمد کرکے ضبط کی گئی۔پولیس کے مطابق منشیات کو فروخت کرنے کے بعد اس سے حاصل شدہ رقم سے ہی گاڑیاں خریدی گئیں تھی۔اس موقع پران کے قبضے سے 3 ہتھ گولے ، دو اے کے میگزین، 65 اے کے گولیوں کے راونڈ بھی برآمد کئے گئے۔پولیس نے معاملے کی نسبت کیس زیر نمبر 116/2022 تھانہ پولیس چاڈورہ میں درج کیا۔
ملی ٹینسی کیس
این آئی اے کے چھاپے جاری،4گرفتاریاں
سید اعجاز
سرینگر+پلوامہ// قومی تحقیقاتی ایجنسی (این آئی اے) پہلے سے رجسٹرڈ ملی ٹینسی کیس کے سلسلے میں جموں اور کشمیر میں کئی مقامات پر چھاپے مار رہی ہے۔انہوں نے بتایا کہ پولیس اور سی آر پی ایف کے تعاون سے این آئی اے نے اننت ناگ، بارہمولہ، بڈگام، بانڈی پورہ، پلوامہ، سوپور، سرینگر اور کٹھوعہ کے کچھ حصوں میں چھاپے مارے۔سرینگر میں، این آئی اے کے اہلکاروں نے فیصل سجاد نائیکو (14) ولد سجاد احمد نائیکوساکن کنہ مزار نواکدل حال علی کدل کے رہائشی ہیں، کی رہائش گاہ پر چھاپہ مارا۔ این آئی اے ٹیم نے تلاشی کے دوران فیصل اور اس کے والدین کے موبائل فون ضبط کر لئے ۔ذرائع نے بتایا کہ لڑکے کے ساتھ اس کے والد سجاد احمد نائیکو (ڈرائیور) (47) کو بھی NIA ٹیم نے پوچھ گچھ کے لیے حراست میں لیا ہے۔جانچ ایجنسی کی ایک اور ٹیم نے ایک سابق جنگجو کے گھر پر چھاپہ مارا جس کی شناخت سید فیاض احمد چیوڑارہ بیروہ کے طور پر کی گئی۔ فیاض کو گرفتار کیا گیا۔بانڈی پورہ میں این آئی اے کے اہلکاروں نے عبدالمجید ڈار ولد علی محمد ڈار گنستان اور اویس احمد شیخ ولد عبدالرشید ساکن بنکوٹ کے گھروں پر بھی چھاپے مارے۔ترال کے لرو جاگیر اور بٹھ نور نامی گائوں میں این آئی اے نے جمعہ کی صبح چھاپہ ماری کی جس دوران ایک طالب علم اور اور لکڑی فروش کو حراست میں لیا گیا۔ دونوں گرفتار ا فراد کی شناخت اعجاز احمد راتھر ولد غلام محمد راتھر ساکن بٹھ نور اور ماجد نذیر ولد نذیر احمد بٹ ساکن لروجاگیر ترال کے طور کی گئی ہے ۔ اعجاز جلانے کی لکڑی کا کار بار کرتا ہے جبکہ ماجد سیکنڈ ائیر کا طالب علم ہے ۔ قومی تحقیقاتی ایجنسی بہت سے دوسرے مقامات کی تلاش کر رہی ہے جس کی تفصیلات جمع کی جا رہی ہیں۔جمعہ کو تلاشی کے دوران، مشتبہ افراد کے احاطے سے مختلف مجرمانہ دستاویزات اور الیکٹرانک آلات ضبط کیے گئے”۔ سرکاری ذرائع نے بتایا کہ اس کیس کی مزید تفتیش جاری ہے۔
