عظمیٰ نیوز سروس
سرینگر// یہاں 11نومبر کو شیڈول ضمنی انتخابات سے پہلے اسمبلی حلقہ بڈگام کیلئے پوسٹل بیلٹ اور ہوم ووٹنگ کا عمل بدھ کو شروع ہوا۔پوسٹل بیلٹ ووٹنگ کا عمل بلاک ڈیولپمنٹ دفتر بڈگام میں شروع ہوا، تاکہ تمام اہل ووٹرز، خاص طور پر ضروری خدمات کے ملازمین جو انتخاب کے دن پولنگ سٹیشنوں پر حاضر نہیں ہو سکتے، کو اپنے جمہوری حقوق کا استعمال کرنے کا موقع ملے۔ پوسٹل بیلٹ ووٹنگ کا آغاز انتخابی عمل میں تمام ملازمین کی شمولیت کو یقینی بنائے گا ۔ پوسٹل بیلٹ ووٹنگ کا عمل 5 نومبر 2025 سے شروع ہوکر مسلسل تین دن تک جاری رہے گا۔ ڈسٹرکٹ الیکشن آفیسر بڈگام ڈاکٹر بلال محی الدین بٹ نے تمام اہل ووٹروں کے لیے آزادانہ اور منصفانہ ووٹنگ کے عمل کو یقینی بنانے کے عزم پر زور دیا۔ادھر الیکشن کمیشن نے جسمانی طور کمزور افراد کی شرکت کو یقینی بنانے کے لیے ہوم ووٹنگ متعارف کرائی ہے، جس سے اہل بزرگ شہریوں اور معذور افراد کو ان کی رہائش گاہوں سے ووٹ ڈالنے کی اجازت دی گئی ہے۔ یہ سہولت 85 سال اور اس سے زیادہ عمر کے ووٹرز کے ساتھ ساتھ 40 فیصد یا اس سے زیادہ بینچ مارک معذوری والے افراد کے لیے دستیاب ہے۔کمیشن کے رہنما خطوط کے مطابق اس عمل کو آسان بنانے کے لیے پریزائیڈنگ افسران، پولنگ حکام اور سیکورٹی اہلکاروں پر مشتمل پولنگ ٹیموں نے اہل ووٹروں کے گھروں کا دورہ کیا۔ہوم ووٹنگ کا اقدام رسائی، شمولیت، اور اس بات کو یقینی بنانے کے لیے کہ انتخابی عمل میں کوئی ووٹر پیچھے نہ رہ جائے، الیکشن کمیشن کے عزم کو واضح کرتا ہے۔
