عظمیٰ یاسمین
تھنہ منڈی // 10 محرم الحرام کو سب ڈویژں تھنہ منڈی کے شاہدرہ شریف علاقے میں عالم اسلام کے بلند پایہ ولی کامل حضرت بابا غلام شاہ بادشاہ مشہدی رحمتہ اللہ علیہ کا218واں سالانہ عرس پاک صدر انجمن علماء اہلسنت صوبہ جموں حضرت مولانا حافظ محمد سعید نقشبندی کی صدارت میں نہایت ہی عقیدت و احترام کے ساتھ منایا گیا۔ جس میں بلا تفریق مذہب و ملت ریاست بھر سے عقیدت کی ایک بڑی تعداد نے شرکت کی۔
ولی کامل کے سالانہ عرس پاک کے سلسلے میں سوموار اور منگلوار کی درمیانی رات کو زیارت شاہدرہ شریف سے متصل جامع مسجد میں شب خوانی، درود و اذکار اور ختمات المعظمات کی روح پرور مجالس کا انعقاد کیا گیا۔ اس موقع پر اے سی آر راجوری اور ایڈمنسٹریٹر اوقاف اسلامیہ راجوری کے ساتھ ساتھ ضلع بھر سے مختلف علماء کرام و مشائخِ عظام اور شعبہ ہائے زندگی سے تعلق رکھنے والی کئی اہم سیاسی اور سماجی شخصیات اور مذہبی اسکالروں کے علاوہ عقیدت مندوں کی ایک کثیر تعداد نے شرکت کی۔ قاری وجاہت اور قاری شوکت حسین رضوی نے تلاوتِ کلامِ الٰہی سے پروگرام کا آغاز کیا، جس کے بعد محفلِ حمد و نعت اور مناجات و مناقب اور تقاریر کا سلسلہ بھی رات بھر جاری رہا۔
واضح رہے کہ شاہدرہ شریف میں عرس پاک کی تقریب پیر کے روز بعد نماز مغرب شروع ہوئی اور منگل کو صبح تین بجے ملک کے ساتھ ساتھ یو ٹی جموں کشمیر اور پوری دنیا میں بحالی امن کے لیے خصوصی اور رقت آمیز دعا کے ساتھ اختتام پذیر ہوا۔ رات بھر جاری رہنے والی پر وقار اور روح پرور مجالس میں علماء کرام اورو دیگر خطباء نے بابا غلام شاہ بادشاہ رحمتہ اللّٰہ علیہ کی عظیم و جلیل القدر شخصیت، تعلیمات سیرت، تبلیغی مشن اور روحانی کمالات پر تفصیلا روشنی ڈالی۔
عرس مبارک کے موقع پر تمام علماء کرام نے اولیاء اللہ کی دینی خدمات خصوصاً سید بابا غلام شاہ بادشاہ کے روحانی کمالات پر روشنی ڈالی۔ دعا کے بعد منگل کو بھی عقیدت مندوں میں لنگر شریف کی تقسیم کاری کا عمل لگاتار جاری رہا۔اس دوران جموں و کشمیر پولیس کے جوان اپنی ڈیوٹی پر مامور رہے۔ جامع مسجد شاہدرہ شریف کے امام و خطیب حافظ عبدالقیوم نے بڑی خوش اسلوبی کے ساتھ نظامت کے فرائض سرانجام دئے۔ وہیں سب ڈویژن تھنہ منڈی کی مختلف مساجد میں یوم عاشورہ کے حوالے سے روح پرور مجالس کا انعقاد ہوا جس میں علماء کرام نے حضرت امام عالی مقام کی شہادت پر ایمان افروز بیانات کئے۔
