عظمیٰ نیوز سروس
پونچھ/ / ایڈیشنل ڈائرکٹر جنرل آف پولیس (امن و امان) وجے کمار اور ڈویژنل کمشنر جموں رمیش کمار نے ضلع پونچھ کا دورہ کیا تاکہ دہرہ کی گلی (ڈی کے جی) انکاؤنٹر کے بعد ضلع میں سیکورٹی صورتحال کا جائزہ لیا جا سکے جس میں 5 فوجی جوا ن لقمہ اجل بن گئے۔ انسپکٹر جنرل آف پولیس آنند جین، ڈی آئی جی راجوری پونچھ رینج ڈاکٹر حسیب مغل بھی اے ڈی جی پی کے ساتھ تھے۔دورے کے دوران افسران نے سول سوسائٹی کے وفود سے ملاقاتیں کیں اور مختلف مسائل پر رائے لی۔ مقامی لوگوں کے ساتھ بات چیت کرتے ہوئے ڈویژنل کمشنر نے مقامی برادریوں کو ضلع میں دہشت گردی سے متعلق واقعات کی روک تھام کے لیے سیکورٹی کے بہتر انتظامات اور ایک نئے پلان آف ایکشن کا یقین دلایا۔ڈویژنل کمشنر نے مکینوں کو دہشت گردی سے متعلق واقعات کے تمام متاثرین کے ساتھ منصفانہ سلوک/ معاوضے کی یقین دہانی کرائی۔انہوں نے یقین دلایا کہ ایل جی انتظامیہ تمام اضلاع بالخصوص پونچھ اور راجوری کے سرحدی اضلاع میں امن برقرار رکھنے اور مکمل تحفظ کا احساس دلانے کے لیے پرعزم ہے۔ڈپٹی کمشنر پونچھ یاسین ایم چودھری اور ایس ایس پی پونچھ ونے کمار کے ساتھ سیکورٹی سے متعلق مختلف پہلوؤں پر تفصیلی بات چیت کی گئی۔ جیسا کہ بحث شروع ہوئی، اے ڈی جی پی (لا اینڈ آرڈر) اور صوبائی کمشنر نے ضلع میں سیکورٹی کے عمومی منظر نامے کو بہتر بنانے کے لیے چوکسی بڑھانے کے لیے ضلعی انتظامیہ کو متعدد ہدایات جاری کیں۔مقامی وفود نے ضلع میں سیکیورٹی کے اہم مسائل سے نمٹنے میں ایل جی انتظامیہ کے فوری ردعمل کو سراہا اور امن و امان کو برقرار رکھنے میں انتظامیہ کو اپنے مکمل تعاون کا یقین دلایا۔
