عظمیٰ نیوز سروس
سرینگر//انسداد بدعنوانی بیورو (اے سی بی)نے منگل کے روز پٹواری حلقہ چھانہ پورہ، سرینگر کو 40,000 روپے کی رشوت طلب کرتے ہوئے گرفتار کر لیا ۔ ایک بیان میں کہا گیا ہے کہ جموں و کشمیر اینٹی کرپشن بیورو کو ایک تحریری شکایت موصول ہوئی ، جس میں الزام لگایا گیا کہ پٹواری حلقہ چھانہ پورہ سرینگر، فاروق احمد بٹ ساکن بوگام چاڈورہ اپنے رہائشی مکان واقع گردوارہ لین چھانہ پورہ کے سلسلے میں 15 مرلہ اراضی ، جسے اس نے فروخت کردیا ہے، اورجس کے لیے اس نے 15 دن پہلے آن لائن درخواست دی تھی، کے ریونیو کاغذات کے عوض 40ہزار روپے رشوت طلب کررہا ہے۔شکایت کنندہ نے کہا کہ وہ رشوت کے خلاف ہے اور اس نے انسداد بدعنوانی بیورو اے سی بی سرینگر سے رجوع کیا تاکہ ملزم سرکاری ملازم کے خلاف قانون کے تحت قانونی کارروائی کی جا سکے۔ شکایت کی وصولی پر صوابدیدی تصدیق کی گئی، جس سے متعلقہ سرکاری ملازم کے مطالبے کی تصدیق ہوئی اور اسی کے مطابق، بیورو میں سیکشن 7 پی سی ایکٹ 1988 کے تحت ایف آئی آر نمبر 17/2024 کے تحت مقدمہ درج کیا گیا اور تفتیش شروع کی گئی۔ تحقیقات کے دوران ایک ٹریپ ٹیم تشکیل دی گئی اور ٹیم نے ایک کامیاب جال بچھا کر ملزم سرکاری ملازم فاروق احمد بٹ ، پٹواری کو شکایت کنندہ سے 40,000 روپے رشوت کی رقم کا مطالبہ کرتے ہوئے رنگے ہاتھوں پکڑ لیا۔ملزم پٹواری کی ذاتی تلاشی کے دوران دیگر اشیا سمیت 35ہزار روپے کی نقدی بھی برآمد کر کے مقدمہ درج کر لیا۔ اسے موقع پر گرفتار کر لیا گیا۔
