سرینگر// ایکو فرنڈس کالونی حیدپورہ کے لوگوں کیلئے خستہ حال اندرون سڑکیں وبال جان بن چکی ہے جس کی وجہ سے انہیںسلامتی کے حوالے سے سخت خدشات لاحق ہو رہے ہیں۔مقامی لوگوں نے بتایا کہ امرت سکیم کے تحت نکاسی آب کیلئے جو ڈرین تعمیر کی جا رہی ہے،اس کی وجہ سے پہلے گنگ بگ علاقے سے ایکو فرنڈس کالونی کا رابطہ منقطع کیا گیااور سڑک کو بند کیا گیا جبکہ بعد میں بیک وقت حید پورہ علاقے سے بھی جانے والی سڑک کو کاٹ دیا گیا۔انہوں نے کہا کہ مقامی لوگوں کو محصور بنا لیا گیا ہے اور حکام خواب غفلت میں سو کر متعلقہ تعمیراتی ٹھکیداروں اور ایجنسیوں کو جوابدہ نہیں بنا رہے ہیں۔انہوں نے کہا کہ گزشتہ3ماہ سے صورتحال جوں کی توں ہیںجس کی وجہ سے اہل علاقہ سخت پریشانیوں میں مبتلا ہیں۔مقامی لوگوں کے مطابق اس صورتحال کی وجہ سے اندرون رابطہ سڑکیں انتہائی خستہ ہال ہوچکی ہے،اور معمولی بارشوںکی وجہ سے کیچڑ کے ڈھیر میں تبدیل ہوتی ہے۔انہوںنے کہا کہ بعض جگہوں پر سڑکوں میں اتنے بڑے گڑھے پڑ چکے ہیںکہ چھوٹے بچوں کو اس میں گرنے کا احتمال ہے ۔مقامی لوگوں نے مزید بتایا کہ جہاںاندرون سڑکیں بارشوں کے ساتھ ہی جھیل میں تبدیل ہوتی ہیں وہی بزرگوں ،بچوں اور خواتین کا گھروں سے باہر آنا اورجانا مشکل ہوجاتا ہے۔ مقامی لوگوں نے کشمیر عظمیٰ کو بتایا کہ اگر چہ کئی بار ارباب اقتدار اور انتظامیہ کی نوٹس میں بھی یہ بات لائی گئی تاہم انہوں نے کوئی توجہ نہیں دی۔ان کا کہنا تھا کہ مقامی لوگوں کو ایک تو رابطہ سڑکیں بند ہوئی ہیں،اور ثانیاً یہ کہ اگر کوئی نامسائد صورتحال پیش آئے،یا خدا نخواستہ آگ کی کوئی واردات پیش آئے تو پورا علاقہ منٹوں میں راکھ کے ڈھیر میں تبدیل ہوگاکیونکہ دونوں اطراف سے رابطہ سڑکیں منقطع ہونے کے بعد کسی بھی گاڑی کو اندر جانے کی کیلئے جگہ موجود نہیں ہے۔مقامی لوگوں کے مطابق بیماروں کو بھی کندھوں پر اٹھا کر باہر سڑک پر لانا پڑتا ہے اور اس کے بعد ہی انہیں اسپتال پہنچایا جاتا ہے جس کی وجہ سے اہل علاقہ سخت تشویش میں مبتلا ہے۔لوگوں نے انتظامیہ اور حکومت سے مطالبہ کیا کہ فوری طور پر اس سلسلے میں اقدامات کئے جائیں۔
ایکو فرنڈس کالونی حیدرپورہ کی سڑکیں خستہ حال
