ایشیا کپ سے قبل دراوڈ کورونا سے متاثر

ممبئی//ہندوستانی مرد کرکٹ ٹیم کے ہیڈ کوچ راہل دراوڈ اس ہفتے سے شروع ہونے والے ایشیا کپ 2022 سے قبل کورونا وائرس سے متاثر ہو گئے ہیں۔ دراوڈ کے کورونا انفیکشن ہونے کا مطلب ہے کہ وہ متحدہ عرب امارات (یو اے ای) میں 27 اگست سے شروع ہونے والے ایشیا کپ کے لیے منگل کو دبئی جانے والی ہندوستانی ٹیم کا حصہ نہیں ہوں گے ۔ تاہم، بورڈ آف کنٹرول فار کرکٹ ان انڈیا (بی سی سی آئی) نے اس بارے میں کوئی باضابطہ اعلان نہیں کیا ہے ۔ دراوڈ کی غیر موجودگی میں وی وی ایس لکشمن ہندوستانی ٹیم کی قیادت کر سکتے ہیں۔ لکشمن نے پیر کو ختم ہونے والے زمبابوے کے دورے پر بھی ہندوستانی ٹیم کے کوچ کا کردار ادا کیا تھا۔ اس سے قبل وہ آئرلینڈ کے خلاف دو میچوں کی ٹی20 سیریز میں بھی ہندوستان کی قیادت کر چکے ہیں۔