ایران میں صدارتی انتخابات کی تاریخ کا اعلان فوجی قیادت نے ہیلی کاپٹر حادثے کی تحقیقات شروع کی

یواین آئی
تہران// ایرانی صدر ابراہیم رئیسی و دیگر کی ہیلی کاپٹر حادثے میں المناک موت کے بعد ایران کے عبوری صدر محمد مخبر نے صدارتی انتخابات 28 جون کو کرانے کا فیصلہ کیا ہے۔بین الاقوامی خبر رساں ادارے کی رپورٹ کے مطابق ایران کے عبوری صدر محمد مخبر کی زیرصدارت اعلیٰ سطحی اجلاس کا انعقاد کیا گیا، جس میں پارلیمنٹ کے اسپیکر اور عدلیہ کے سربراہ شریک ہوئے۔ایران کے عبوری صدر محمد مخبر کی زیرصدارت اجلاس میں یہ فیصلہ کیا گیا کہ ایران میں صدارتی انتخابات 28 جون کو کرائے جائیں گے۔صدارتی انتخابات کی مہم 12 سے27 جون تک چلائی جائے گی جبکہ صدارتی امیداروں کی رجسٹریشن 30 مئی سے 3 جون تک ہوگی۔واضح رہے کہ ایران میں صدارتی انتخابات کا اعلان صدر ابراہیم رئیسی کی ہیلی کاپٹر حادثے میں المناک موت کے بعد سامنے آیا ہے۔ایرانی میڈیا کا کہنا ہے کہ ایرانی فوج کے چیف آف اسٹاف میجر جنرل محمد باقری نے تحقیقاتی کمیٹی بنادی ہے۔ جس نے ہیلی کاپٹر حادثے کی تحقیقات شروع کردی ہے۔تحقیقاتی کمیٹی کی سربراہی بریگیڈیئر علی عبداللہی کریں گے، کمیٹی کے اراکین نے جائے حادثہ پر پہنچ کر صدر ابراہیم رئیسی کا ہیلی کاپٹر تباہ ہونے کی وجوہات جاننے کے لئے تحقیقات کا آغاز کردیا ہے۔ایرانی میڈیا کے مطابق واقعہ کی تحقیقات مکمل ہوتے ہی انہیں عوام کے سامنے رکھا جائے گا، ایران کے صدر کا ہیلی کاپٹر اتوار کی دوپہر حادثے کا شکار ہوگیا تھا۔

ابراہیم رئیسی کاانتقال،مانومیں تعزیتی اجلاس
عظمیٰ نیوزڈیسک
حیدرآباد//صدر ایران سید ابراہیم رئیسی اور دیگر اعلیٰ ایرانی عہدیداران کی ہیلی کاپٹر حادثہ میں رحلت پر اپنے گہرے دکھ کا اظہار کرتے ہوئے وائس چانسلر مولانا آزاد نیشنل اردو یونیورسٹی پروفیسر سید عین الحسن نے تعزیت کا اظہار کیا۔ انہوں نے کہا کہ صدر ایران رئیسی کے دورِ صدارت میں ہندوستان اور ایران کے خوشگوار تعلقات کو مزید استحکام حاصل ہوا تھا۔ ان کے انتقال سے ہندوستانیوں بالخصوص فارسی کے اساتذہ و اسکالرس اور ہند و ایران فرہنگ و ثقافت سے دلچسپی رکھنے والوں کا ناقابل تلافی نقصان ہوا۔ قبل ازیں شعبۂ فارسی و مطالعاتِ وسط ایشیاء، مولانا آزاد نیشنل اردو یونیورسٹی میں صدرِ ایران سید ابراہیم رئیسی کی شہادت پر ایک تعزیتی اجلاس منعقد کیا گیا۔ اس اجلاس میں رجسٹرار، اردو یونیورسٹی پروفیسر اشتیاق احمد نے وائس چانسلر پروفیسر سید عین الحسن کا تعزیتی بیان پڑھ کر سنایا۔