عشرت حسین بٹ
منڈی//تحصیل منڈی کے علاقہ چکھڑی بن میں بدھ اور جمعرات کی درمیانی شب کوایک دو منزلہ مکان آسمانی بجلی گرنے سے جل کر راکھ ہو گیا ہے۔ ذرائع کے مطابق بدھ اور جمعرات کی درمیانی شب منڈی بلاک لورن کے تحت پڑنے والے علاقہ چکھڑی بن میں اچانک دین محمد ولد میر بازنامی شخص کے دو منزلہ رہایشی مکان پر آسمانی بجلی گری جس کی وجہ سے مکان پوری طرح سے جل کر راکھ ہو گیا اور اسے لاکھوں روپے کا مالی نقصان ہوا ہے ۔ایس ایچ او لورن ساجد احمد نے کشمیر عظمی کو بتایا کہ موسم کی خرابی کی وجہ سے دو منزلہ مکان پر آسمانی بجلی گری جس کی وجہ سے مکان خاکستر ہو گیا ۔ان کا کہنا تھا اگر چہ مقامی لوگوں نے انسانی جانوں کو بچا لیا مگر مکان میں رکھا ہوا تمام مال و اسباب جل کر راکھ ہو گیا۔ ان کا کہنا تھا کہ علاقہ دور اور سڑک نہ ہونے کی وجہ سے فائر اینڈ ایمر جنسی سروس پہنچانا نامکمل تھا ۔ایس ایچ او موصوف نے بتایا کہ جمعرات کو پولیس کی ایک ٹیم نے وہاں جا کر نقصان کا جایزہ لے کر پولیس تھانہ لورن میں ایک کیس بھی درج کر لیا ہے۔
