انگلینڈ کے گیندبازوں کی شاندار کارکردگی سے جنوبی افریقہ کی شکست

مانچسٹر//عادل رشید (3 وکٹ)، ریس ٹوپلی (2 وکٹ) اور معین علی (2 وکٹ) کی شاندار گیندبازی کی بدولت انگلینڈ نے دوسرے ون ڈے میں جنوبی افریقہ کو 118 رنز سے شکست دے دی۔ بارش سے متاثرہ میچ میں انگلینڈ نے افریقہ کو 202 رنز کا ہدف دیا تھا جس کے جواب میں جنوبی افریقہ 83 رنز پر آل آؤٹ ہو گئی۔ اس جیت کے ساتھ ہی انگلینڈ نے تین میچوں کی سیریز 1-1 سے برابر کر دی۔ ٹاس ہارنے کے بعد انگلینڈ پہلے بیٹنگ کرنے آیا لیکن وہ وقفے وقفے سے وکٹیں کھوتا رہا۔ 101 رنز پر چھ وکٹیں گرنے کے بعد لیام لیونگسٹن اور سیم کیرن نے انگلینڈ کی اننگز کو سنبھالا۔ لیونگسٹن نے 26 گیندوں میں تین چھکوں اور ایک چوکے کی مدد سے 38 رنز بنائے جبکہ کیرن نے 18 گیندوں میں دو چوکوں اور تین چھکوں کی مدد سے 35 رنز بنائے ۔ اس کے علاوہ ڈیوڈ ولی نے 21 (21) اور عادل رشید نے 12 (12) رنز بنائے اور انگلینڈ کی ٹیم 28.1 اوورز میں 201 رنز پر آل آؤٹ ہوگئی۔