ملی ٹینسی مخالف حکمت عملی کا از سر نو جائزہ
ملوث لوگوں کیخلاف سخت کارروائی کریں:ڈی جی پی
سرینگر// ڈائریکٹر جنرل پولیس دلباغ سنگھ نے جنوبی کشمیر میں ضلع اننت ناگ کا دورہ کیا جہاں انہوں نے پولیس، فوج اور سی آر پی ایف کے افسران کی اعلی سطحی میٹنگ کی صدارت کی اور جنوبی کشمیر کے سیکورٹی حالات کا جائزہ لیا ۔انکے ہمراہ سپیشل ڈی جی سی آئی ڈی آر آر سوین،ایڈیشنل ڈائریکٹر جنرل سی آر پی ایف نیلن پربھات،ایڈیشنل ڈائریکٹر جنرل آرمڈ ایس جے ایم جیلانی،ایڈیشنل ڈائریکٹر جنرل کشمیر وجے کمار اورانسپکٹر جنرل سی آر پی ایف جی کے ورما بھی تھے۔ڈی جی پی نے اجلاس سے خطاب کرتے ہوئے افسران کو ہدایت کی کہ وہ امن دشمن عناصر سے نمٹنے کے لیے حکمت عملی کا از سر نو جائزہ لیں تاکہ لوگوں کے تحفظ کو یقینی بنایا جا سکے۔ انہوں نے انٹیلی جنس نیٹ ورکس کو مزید وسعت دینے اور کسی بھی ناخوشگوار واقعے سے قبل معلومات کے اشتراک کی اہمیت پر زور دیا۔ انہوں نے مشترکہ رات کے تسلط اور پیدل گشت پر زور دیا۔
ڈی جی پی نے ملی ٹینٹوں کا سراغ لگانے کے لیے مشتبہ مقامات پر منصوبہ بند تلاشی شروع کرنے کی ہدایت دی۔ڈی جی پی نے مزید چوکسی اور امن و استحکام کو بڑھانے کے لیے فعال کارروائیوں کی ضرورت پر زور دیا۔ ڈی جی پی نے صورتحال پر باقاعدہ اپ ڈیٹس پر زور دیا اور افسران کو ہدایت دی کہ وہ امن مخالف سرگرمیوں میں ملوث لوگوں کے خلاف سخت کارروائی کریں۔ انہوں نے افسران کو حفاظتی انتظامات کو مضبوط بنانے اور امن دشمن عناصر کو امن کو خراب کرنے کا کوئی موقع نہ ملنے کو یقینی بنانے کے لیے تمام ضروری اقدامات کرنے کی ہدایت کی۔دہشت گردوں کو اپنے مذموم عزائم کو انجام دینے میں مدد کرنے والے سپورٹ نیٹ ورکس کے خلاف مزید چوکس رہنے پر زور دیتے ہوئے ڈی جی پی نے جموں و کشمیر کو دہشت گردی سے پاک کرنے کے لیے تمام کوششیں بروئے کار لانے کی ہدایت دی۔ ڈی جی پی نے انسداد دہشت گردی کی کارروائیوں کے ایک اہم حصے کے طور پر لوگوں کا مزید اعتماد اور تعاون حاصل کرنے کی ضرورت پر بھی روشنی ڈالی۔ امرناتھ یاترا کے سلسلے میں، ڈی جی پی نے افسران کو ہدایت دی کہ وہ اس بات کو یقینی بنائیں کہ تمام انتظامات پر احتیاط سے عمل کیا جائے تاکہ یاترا کو حادثات سے پاک کیا جاسکے۔ انہوں نے یاترا کے مجموعی حفاظت اور ہموار انعقاد کو یقینی بنانے کے لیے بہترین ممکنہ انتظامات پر زور دیا۔ انہوں نے افسران کو ہدایت دی کہ وہ یاترا کی کامیاب تکمیل کے لیے اپنی محنت جاری رکھیں۔
اجلاس کے دوران ابھرتے ہوئے چیلنجز اور ان کے انسداد کے اقدامات پر بھی تفصیلی تبادلہ خیال کیا گیا۔ وادی میں دہشت گردی کے جرائم کے بارے میں تفصیلی تبادلہ خیال کیا گیا اور میٹنگ میں موجود افسران نے انسداد دہشت گردی آپریشنز اور جموں و کشمیر میں امن کو مزید مضبوط بنانے کے لیے تجاویز دیں۔افسران نے ڈی جی پی کو اننت ناگ اور جنوبی کشمیر کے دیگر اضلاع میں علاقے کے تسلط سے آگاہ کیا۔ ڈی جی پی کو بتایا گیا کہ سیکورٹی فورسز سٹریٹجک مقامات پر تعینات ہیں۔ انہیں جنوبی کشمیر کے انسداد دہشت گردی سیکورٹی گرڈ کے بارے میں بھی بریفنگ دی گئی۔میٹنگ میں بریگیڈیئر اے ایس پنڈیر 2 سیکٹر آر آر، ڈی آئی جی رئیس محمد بٹ، ڈی آئی جی سی آر پی ایف آپریشنز ایس داسوال، ڈی آئی جی او پی ایس(سی آر پی ایف) شری آلوک اوستھی، کرنل اے کے سگوترا(53آر آر)، کرنل دیون سود (55آر آر)،کرنل اجیت اگروال تھرڈ آر آر،کمانڈنگ آفیسر 90بٹالین سی آر پی ایف ایم اے ایم رضوان، سی او 18 بٹالین اے کے چورسیا، سی او 14 ویںبٹالین سی آر پی ایف آر پی مینا، سی او 116 بٹالین سی آر پی ایف نرویر سنگھ، سی او 130 بٹالین سی آر پی ایف راجیو یادو، سی او آئی آر پی 10 بٹالین اعجاز احمد، کمانڈنگ آفیسر آئی آر پی جاوید اقبال،ایس ایس پی اننت ناگ اشیش کمار مشرا،، ایس ایس پی کولگام ساحل سرنگل، ایس ایس پی شوپیان تنوشرے، ایس ایس پی پلوامہ محمد یوسف اور ایس ایس پی اونتی پورہ اعجاز احمد زرگر، ڈپٹی سی او سجاد شاہ، 182بٹالین سی آر پی ایف نوڈل آفیسر پلوامہ جے سنگھ،14بٹالین سی آر پی ایف نوڈل آفیسر شوپیانروپیش کماراور ایس پی ہیڈکوارٹر اننت ناگ مس دیپیکا شامل تھے۔
