عظمیٰ نیوز سروس
سرینگر// چیف الیکشن کمشنر راجیو کمار کی سربراہی میں الیکشن کمیشن آف انڈیا نے الیکشن کمشنروں گیانیش کمار اور ڈاکٹر ایس ایس سندھو کے ساتھ مرکز کے زیر انتظام علاقوں میں اسمبلی انتخابات کے لیے انتخابی تیاریوں کی نگرانی کے لیے جموں و کشمیر کا ایک اہم دو روزہ دورہ شروع کیا ہے۔ یہ دورہ خطے میں بغیر کسی رکاوٹ اور شفاف انتخابی عمل کو آسان بنانے کے لیے ای سی آئی کے غیر متزلزل عزم کی نشاندہی کرتا ہے۔جمعرات کو، ای سی آئی کی ٹیم اسٹیک ہولڈرز کے ایک سپیکٹرم کے ساتھ وسیع غور و خوض میں مصروف رہی، جس میں قومی اور ریاستی تسلیم شدہ سیاسی جماعتوں کے نمائندے بھی شامل ہیں تاکہ ان سے قیمتی آرا حاصل کی جا سکے اور ان کے خدشات کو سمجھا جا سکے، تاکہ انتخابی عمل میں ان کی فعال شمولیت کو تقویت ملے۔
دن کے آخر میں، ای سی آئی نے انتخابات کے انعقاد کے لیے اہم انتظامی اور حفاظتی انتظامات پر غور کرنے کے لیے ضلعی انتخابی افسران اور پولیس سپرنٹنڈنٹس(ایس پیز) کے ساتھ انتخابی تیاریوں کا جائزہ لیا۔مزید برآں، چیف الیکٹورل آفیسر، اسپیشل پولیس نوڈل آفیسراور سنٹرل پولیس فورسز نوڈل آفیسر کے ساتھ شام کا اجلاس منعقد کیا گیا تاکہ انتخابی انتظام میں شامل مختلف ایجنسیوں کے درمیان کوآرڈینیشن کی کوششوں کا جائزہ لیا جاسکے۔9 اگست کو یہ دورہ چیف سکریٹری اور ڈائریکٹر جنرل آف پولیس کے ساتھ حتمی میٹنگ کے ساتھ اختتام پذیر ہوگا۔اس کے بعد ای سی آئی کی ٹیم قانون نافذ کرنے والی ایجنسیوں کے ساتھ جائزہ لینے کے بعد ایک پریس کانفرنس کے اختتام پر دورہ مکمل کرے گی۔الیکشن کمیشن آف انڈیاکی ٹیم سیاسی جماعتوں سے رائے لینے کے لیے سرینگر پہنچ گئی۔چیف الیکشن کمشنر راجیو کمار کی قیادت میں ٹیم صبح یہاں پہنچی اور ایس کے آئی سی سی میں سیاسی جماعتوں کے نمائندوں سے ملاقات کی۔چیف الیکٹورل آفیسر، جموں و کشمیر کے دفتر نے منگل کو مختلف سیاسی جماعتوں کو خطوط جاری کئے تھے، جس میں انہیںکمیشن کے ساتھ میٹنگ کے لیے مدعو کیا گیا ۔سیاسی جماعتوں کو الیکشن کمیشن سے ملاقات کے لیے ٹائم سلاٹ دے دیا گیا تھا۔ پولیس اور سول انتظامیہ کے کئی سینئر افسران بشمول چیف الیکٹورل آفیسر پی کے پولے نے کمیشن کا استقبال کیا۔
