عظمیٰ نیوز سروس
جموں// لیفٹیننٹ گورنر منوج سنہا نے ایک اعلیٰ سطحی میٹنگ کی صدارت کی جس میں فوج، فضائیہ، این ڈی آر ایف، سی اے پی ایف کی مسلسل بارش اور سیلاب سے پیدا ہونے والی صورتحال سے نمٹنے کے لیے ریسکیو اور ریلیف آپریشنز اور تیاریوں کا جائزہ لیا گیا۔لیفٹیننٹ گورنر نے حکام کو ہدایت دی کہ وہ اس بات کو یقینی بنانے کے لیے ہر ممکن اقدام کریں کہ نشیبی سیلاب سے متاثرہ علاقوں میں مقیم لوگوں کو محفوظ طریقے سے نکالا جائے۔انہوں نے عہدیداروں سے کہا کہ وہ تمام ضروری خدمات جیسے بجلی، صحت کی دیکھ بھال، پینے کے صاف پانی، راشن اور ٹیلی کنیکٹیویٹی کی دیکھ بھال کو یقینی بنائیں۔ انہوں نے کہا کہ سیلاب سے متاثرہ علاقوں میں درہم برہم ضروری خدمات کو ترجیحی بنیادوں پر بحال کیا جانا چاہیے اور قدرتی آفات سے متاثرہ علاقوں میں ضروری سامان اور ادویات کا مناسب ذخیرہ ہونا چاہیے۔لیفٹیننٹ گورنر نے سڑکوں، قومی شاہراہوں پر پلوں کی فوری بحالی، ٹریفک کی نقل و حرکت کے لیے متبادل راستوں اور پانی سے پیدا ہونے والی بیماریوں کے مریضوں کی آمد کی صورت میں ہسپتالوں کو تیار کرنے کی بھی ہدایت کی۔لیفٹیننٹ گورنر نے حکام کو ہدایت دی کہ غیر ضروری سرکاری دفاتر، سکول اور کالجز کو اگلے نوٹس تک بند رکھا جائے۔ اس سے قبل لیفٹیننٹ گورنر نے کہا ہے کہ متاثرہ افراد کو ہر ممکن مدد فراہم کی جا رہی ہے۔ انہوں نے X پر کہا’’5,000 سے زیادہ لوگوں کو نشیبی سیلاب زدہ علاقوں سے محفوظ مقام پر منتقل کیا گیا انہوں نے مزید کہا، “ہم اس بات کو یقینی بنا رہے ہیں کہ امدادی سامان کی مناسب فراہمی ہے اور متاثرہ افراد کو ہر ممکن مدد فراہم کی جا رہی ہے۔” ایل جی ہسپتالوں کا دورہ کیا اور زخمیوں کی عیادت کی۔
